تۇركيانىڭ دەمالىس ورىندارىندا قانشا قازاقستاندىق تۋريست بار

استانا. قازاقپارات - قازىر تۇركيادا قانشا قازاقستاندىق ءتۋريستىڭ بارى بەلگىلى بولدى، دەپ حابارلايدى قازاقپارات ءتىلشىسى.

«تۇركياداعى قازاقستاندىقتاردان مينيسترلىك جانىنداعى تۋريزم كوميتەتىنە تۋريستىك جولدامالاردىڭ كۇشىن جويۋ نەمەسە قايتا برونداۋ تۋرالى وتىنىشتەر تۇسكەن جوق. تۋريستىك جولدامادان باس تارتقىسى كەلەتىن ازاماتتار وپەراتورلارعا جۇگىنە الادى. ولار ىلەسپە كوميسسيالاردى ەسكەرە وتىرىپ جانە قىزمەتتەر شارتتارىندا كورسەتىلگەن شىعىنداردى شەگەرىپ، قايتا ەسەپ ايىرىسۋى كەرەك»، - دەدى مادەنيەت جانە سپورت مينيسترلىگىنىڭ رەسمي وكىلى ءمولدىر ابدىۋاليەۆا.

رەسمي وكىلدىڭ ايتۋىنشا، تۋريستىك وپەراتورلار دەمالىس كۇندەرىن، باعىتىن، باراتىن ەلدى اۋىستىرۋ جانە بالاما نۇسقا ۇسىنا الادى.

«بۇگىنگى تاڭدا تۇركيانىڭ دەمالىس ورىندارىندا 254 قازاقستاندىق تۋريست بار»، - دەيدى ول.

ەسكە سالايىق، دۇيسەنبىدە تۇركيانىڭ وڭتۇستىك- شىعىسىنداعى گازيانتەپ پروۆينتسياسىندا 6,4-6,6 ماگنيتۋدالى، كەيىن 7,4 ماگنيتۋدالى قۋاتتى جەر سىلكىنىسى بولدى.

جويقىن جەر سىلكىنىسىنەن قازا تاپقاندار سانى بۇگىن 7108 گە جەتتى، 40910 ادام جارالاندى.

تابيعات اپاتىنان كەيىن Astana Hub تەحنوپاركىنىڭ حالىقارالىق اگەنتى ميرۋس قۇرماشيەۆ حاتاي قالاسىندا جوعالىپ كەتتى. ميرۋس قۇرماشيەۆتىڭ تاعى ءۇش ارىپتەسى بايلانىسقا شىقپاي قالدى.

تۇركيادا، ياعني ءزىلزالا اۋماعىندا قالعان قازاقستاندىقتار قايدا حابارلاسۋعا بولاتىندىعى ايتىلعان ەدى. سىرتقى ىستەر مينيسترىلىگىنىڭ رەسمي وكىلى ايبەك سمادياروۆ ءمالىم ەتكەندەي، قازاقستان ازاماتتارى مەن ولاردىڭ تۋىستارىنا ارنالعان شۇعىل جەلى جۇمىس ىستەپ تۇر.