بوسانعاننان كەيىنگى شاشتىڭ ءتۇسۋىن قالاي توقتاتامىز؟

استانا. قازاقپارات - كوپشىلىك ايەل بالا بوسانعاننان كەيىن شاشىنىڭ كوپ تۇسە باستاعانىن بايقايدى.

دۇنيەگە ءسابي اكەلگەن ايەلدىڭ اعزاسىندا تىنىشتىق (تەلوگەن) كەزەڭى باستالادى. ول ءبىر ايدان التى ايعا دەيىن سوزىلۋى مۇمكىن. بۇل قالىپتى جاعداي. ءبىراق كەيىن ونىڭ قالپىنا كەلۋى قيىنداپ كەتپەس ءۇشىن شاش ساۋلىعىنا ۋاقىتىندا ءمان بەرگەن ءجون.

نەلىكتەن بوسانعاننان كەيىن شاش كوپ تۇسەدى؟

جۇكتىلىك كەزىندە شاش جىلدام وسەدى جانە ءجيى قالىڭدايدى. سەبەبى ايەل اعزاسى جۇكتىلىك كەزىندە ەستروگەن گورموندارىن كوپ مولشەردە بولەدى، ناتيجەسىندە شاش تىنىشتىق كەزەڭىنە اۋىسپاي، تەك ءوسۋ (اناگەن) كەزەڭىندە تۇرادى.

ال بوسانعاننان كەيىن، كەرىسىنشە، شاش قارقىندى تۇسە باستايدى. سەبەبى بۇل كەزدە گورموندى تەپە-تەڭدىك قالپىنا كەلە باستايدى. ەستروگەن مەن باسقا گورموندار دەڭگەيى جىلدام ازايادى. بۇل تىنىشتىق كەزەڭىنە كۇرت اۋىسۋعا ىقپال ەتەدى. سوندىقتان شاش كوپ تۇسەدى.

وعان قوسا، ۇيقىنىڭ قانباۋى، بوسانعاننان كەيىنگى كۇيزەلىس، دۇرىس تاماقتانباۋ جانە جاڭا تۋعان سابيگە كۇتىم جاساۋ كەزىندە پايدا بولاتىن باسقا دا قيىندىقتار شاشتىڭ ودان سايىن تۇسۋىنە اسەر ەتەدى. سونداي-اق شاشتىڭ كوپ تۇسۋىنە تەمىردىڭ جانە دارۋمەندەردىڭ جەتىسپەۋى سەبەپ بولۋى مۇمكىن.

بوسانعاننان كەيىنگى شاشتىڭ ءتۇسۋى قاشان توقتايدى؟

كوپ جاعدايدا بوسانعاننان كەيىنگى شاش ءتۇسۋ ۋاقىتشا بولىپ كەلەدى. ۋاقىت وتە شاش قالىپقا كەلەدى. ول ادەتتە ءدارى-دارمەكپەن ەمدەلۋدى قاجەت ەتپەيدى. شاشتىڭ كوپ ءتۇسۋى ءجيى بوسانعاننان كەيىن 6-12 اي ارالىعىندا توقتايدى. ەگەر شاشىڭىزدىڭ ءتۇسۋى 1 جىلدان اسا ۋاقىت بايقالسا، تريحولوگ نەمەسە دەرماتولوگ دارىگەرگە قارالعان ءجون.

بوسانعاننان كەيىنگى شاشتىڭ ءتۇسۋىن قالاي ازايتامىز؟

بوسانعاننان كەيىنگى شاشتىڭ ءتۇسۋىن ازايتۋ ءۇشىن مىنا كەڭەستەرگە قۇلاق ءتۇرىڭىز:

- ۇيلەسىمدى تاماقتانۋ. بالا ەمىزىپ جۇرگەن انا، ادەتتە، بالادا اللەرگيا شىعىپ كەتپەس ءۇشىن ارتىق نارسە جەۋگە قورقادى. سوندىقتان راتسيون قاتتى شەكتەۋلى بولادى. الايدا ۇيلەسىمدى تاماقتانۋدى ۇيىمداستىرا العان دۇرىس. دۇرىس تاماقتانۋ ايەل دەنساۋلىعىنا دا، شاش ساۋلىعىنا دا قاجەت. مىسالى، بيوتين (جۇمىرتقا)، مايلى قىشقىلدار (بالىق، جاڭعاقتار)، ۆ دارۋمەنى (بروككولي، شپينات)، بەتا-كاروتينگە (ءسابىز) باي ونىمدەر جەڭىز.

- كۇندەلىكتى كۇتىمدى دۇرىس جاساۋ. باستىڭ ساۋ تەرىسى - ساۋ شاشقا اپارار ءبىرىنشى قادام. ولگەن جاسۋشالاردى تۇسىرەتىن باس تەرىسىنە ارنالعان ارنايى سكرابتار قولدانىڭىز. باس تەرىسى تەپە-تەڭدىگىن قالپىنا كەلتىرۋگە كومەكتەسەتىن سەرگىتۋشى قۇرالدار پايدالانىڭىز. ۋاقىتشا فەننىڭ ىستىق لەبىن جانە دە باسقا دا شاشتى كۇيدىرەتىن قۇرالداردى قولدانباي تۇرا تۇرىڭىز.

- سايكەس كوسمەتيكالىق قۇرالدار قولدانۋ. شاشقا ارنالعان سۋسابىن جانە بالزامدى «شاش تۇسۋىنە قارسى» نەمەسە «جۇقا جانە ءالسىز شاشقا» دەگەن تۇرلەرىن الۋعا بولادى. سەبەبى بۇل قۇرالداردىڭ تەكستۋراسى باسقالارىنا قاراعاندا جۇمساعىراق كەلەدى جانە شاشتى اۋىرلاتپايدى.

- باس تەرىسىنە ماسساج جاساۋ. باس تەرىسىنە ساۋساقتارمەن ماسساج جاساۋ قان اينالىمدى جاقسارتادى.

- شاش ۇلگىسىن وزگەرتۋ. شاشتى قاتتى قىسىپ تاستايتىن نەمەسە تارتاتىن شاش ۇلگىلەرىنەن اۋلاق بولىڭىز. ەگەر كۇتىم جاساۋ قيىن بولىپ كەتسە، شاشىڭىزدىڭ ۇزىندىعىن قىسقارتىپ تاستاڭىز.

massaget.kz