وزبەكستاندا مىڭ جىلدىق تاريحى بار داماسك قىلىشتارى تابىلدى
وزبەكستاننىڭ مادەني مۇرا اگەنتتىگىنىڭ حابارلاۋىنشا، نامانعان وبلىسىنداعى اقسيكەنت ەسكى قالا ورنى اۋماعىنان سيرەك تيىندار، قاراحان ءداۋىرىنىڭ كونە قابىرعا سۋرەتتەرى جانە مىڭجىلدىق داماسك قىلىشتارى تابىلعان.
قازىرگى كەزدە مۇراجاي قورىندا ساقتالعان قابىرعا سۋرەتتەرى مەن قىش ىدىستاردى قالپىنا كەلتىرۋ جۇمىستارىمەن ارنايى ماماندار توبى اينالىسۋدا.
«مىڭ جىل بۇرىنعى اتاقتى قىلىشتاردىڭ تابىلعانىنا جانە ولاردىڭ وتانى اقسيكەنت ەكەنىنە تاڭ قالۋدان شارشامايمىز. قىتاي دەرەكتەرىندە اقسيكەنت قالاسىنىڭ قاقپاسى التىننان سالىنعان دەپ جازىلعان. جەرگىلىكتى حالىق اراسىندا بۇل قاقپا سىرداريا وزەنىنىڭ تۇبىندە تۇرىپ قالعان دەگەن اڭىز بار. بۇل، ارينە، تاريحي دەرەكتەرگە نەگىزدەلگەن»، - دەيدى ماماندار.
اقسيكەنت — سىرداريانىڭ وڭ جاعالاۋىندا، قازىرگى وزبەكستاننىڭ نامانعان وبلىسى اۋماعىنداعى ەلدى مەكەن. Ⅲ-Ⅱ عاسىرلاردا نەگىزى قالانعان اقسيكەنت 9 - 10 عاسىرلاردا فەرعانا القابىنىڭ استاناسى جانە ورتالىق ازياداعى بولات وندىرەتىن ورتالىقتاردىڭ ءبىرى بولدى. قالا 1620 -جىلى جەر سىلكىنىسىنەن تولىعىمەن قيراعان.
