تۇرىك اعايىندارعا ازىق-تۇلىك جاعىنان كومەك كورسەتۋگە دايىنبىز – ا ش م

استانا. قازاقپارات - قازاقستان تۇركياداعى جاعدايعا بايلانىستى ازىق-تۇلىكپەن گۋمانيتارلىق كومەك كورسەتۋگە دايىن.

بۇل تۋرالى اۋىل شارۋاشىلىعى ءمينيسترى ەربول قاراشوكەيەۆ ءمالىم ەتتى، دەپ حابارلايدى قازاقپارات ءتىلشىسى.

«باۋىرلاس ەلگە كومەك كورسەتۋ ءبىز ءۇشىن ماڭىزدى. قاجەتتىلىك تۋىنداپ جاتسا، كومەك كورسەتۋ - پارىزىمىز. كومەككە دايىنبىز. ول ءۇشىن تۇركيا تاراپىنان ارنايى سۇرانىس كەلىپ ءتۇسۋى كەرەك. بىزدە حالىقارالىق گۋمانيتارلىق كومەك كورسەتەتىن قور بار. ءبىز دايىنبىز»، - دەدى ەربول قاراشوكەيەۆ ۇكىمەت ۇيىندە وتكەن بريفينگى بارىسىندا ب ا ق وكىلدەرىنىڭ ساۋالىنا جاۋاپ بەرە وتىرىپ.

ايتا كەتسەك، تۇركيانىڭ وڭتۇستىك-شىعىسىنداعى گازيانتەپ پروۆينتسياسىندا 6,4-6,6 ماگنيتۋدالى، كەيىن 7,4 ماگنيتۋدالى قۋاتتى جەر سىلكىنىسى بولدى.

كەشە مەملەكەت باسشىسى قاسىم-جومارت توقايەۆ ۇكىمەتكە تۇركياعا شۇعىل كومەك كورسەتۋدى تاپسىرعان ەدى. سونداي-اق، پرەزيدەنت تۇركيانىڭ وڭتۇستىك-شىعىسىندا كوپتەگەن ادام شىعىنىنا اكەپ سوقتىرعان جەر سىلكىنىسىنە بايلانىستى رەجەپ تايپ ەردوعانعا كوڭىل ايتۋ جەدەلحاتىن جولدادى.

ايتا كەتەيىك، قازاقستان توتەنشە جاعدايلار مينيسترلىگىنىڭ قۇتقارۋشىلارى جەر سىلكىنىسى سالدارىن جويۋعا كومەك كورسەتۋ ءۇشىن الماتىدان تۇركياعا اتتاندى. ونىڭ قۇرامىندا قازاقستاننىڭ رەسپۋبليكالىق جەدەل قۇتقارۋ جاساعىنىڭ قۇتقارۋشىلارى، مەديتسينالىق قىزمەتكەرلەر جانە قىزمەتتىك يتتەر بار.

بۇگىن تۇركياعا ۇشقان قازاقستاندىق قۇتقارۋشىلار بورتى گازيانتەپ قالاسىنا قوناتىنى بەلگىلى بولدى.

سوڭعى مالىمەتتەر بويىنشا، تۇركيانىڭ كاحرامانماراش پروۆينتسياسىندا ءزىلزالادان كوز جۇمعان ادامدار سانى 3381 ادامعا جەتتى، 20426 ادام جاراقات الدى.