تۇركيادا ءزىلزالا اۋماعىندا قالعان قازاقستاندىقتار قايدا حابارلاسا الادى

استانا. انادولى - قازاقپارات - قازاقستاننىڭ تۇركياداعى ەلشىلىگى ەل ازاماتتارىن وتانعا قايتارۋ شارالارىن جۇرگىزىپ جاتىر، دەپ حابارلايدى قازاقپارات.

«قۇرمەتتى قازاقستان ازاماتتارى! 2023-جىلى 6- اقپاندا تۇركيانىڭ وڭتۇستىك-شىعىس اۋماعىندا بولعان جەر سىلكىنىسىنە بايلانىستى، 7- اقپاندا گازيانتەپ قالاسىنداعى قازاقستان ازاماتتارىن ەلگە الىپ كەتۋ شارالارى جۇرگىزىلۋدە. وسى رەتتە قازاقستانعا قايتامىن دەگەن ق ر ازاماتى بولعان جاعدايدا، 7- اقپاندا جەرگىلىكتى ساعات 12:00 دە گازيانتەپ قالاسىنىڭ اۋەجايىندا ءتيىستى پروتسەدۋرالاردان ءوتىپ (پاسپورت باقىلاۋى، قاۋىپسىزدىك تەكسەرىسى ت. ب.)، دايىن بولۋى ءتيىس»، - دەپ مالىمدەمە جاسادى ىستانبۇلداعى قازاقستان كونسۋلدىعى.

سونىمەن قاتار قازاقستانعا ورالۋعا نيەتتى ازاماتتاردىڭ ءتىزىمىن قۇراستىرۋ ءۇشىن مىندەتتى تۇردە كورسەتىلگەن نومىرلەرگە حابارلاسۋ قاجەت: 905388807041+ (كونسۋل تەمىرلان سايلاۋ ۇلى)، 903124919100+ (كەزەكشى كومەندانت).

ايتا كەتەيىك، قازاقستاننىڭ قۇتقارۋشىلارى جەر سىلكىنىسى سالدارىن جويۋعا كومەك كورسەتۋ ءۇشىن الماتىدان تۇركياعا اتتاندى. ونىڭ قۇرامىندا قازاقستاننىڭ رەسپۋبليكالىق جەدەل قۇتقارۋ جاساعىنىڭ قۇتقارۋشىلارى، مەديتسينالىق قىزمەتكەرلەر جانە قۇتقارۋشى يتتەر بار.

ءتيىستى تاپسىرمانى قازاقستان پرەزيدەنتى قاسىم-جومارت توقايەۆ بەردى. بورت ءبىرىنشى كەزەكتە گازيانتەپ قالاسىنا بارادى.

تۇركيا پرەزيدەنتى رەجەپ تايىپ ەردوعان ەلدىڭ وڭتۇستىك-شىعىسىندا بولعان جويقىن جەر سىلكىنىسىنە بايلانىستى 12- اقپانعا دەيىن جەتى كۇندىك ۇلتتىق ازا تۇتۋ جاريالادى.

سوڭعى دەرەكتەرگە سايكەس، تۇركيانىڭ كاحرامانماراش پروۆينتسياسىندا ءزىلزالادان كوز جۇمعان ادامدار سانى 3381 ادامعا جەتتى، 20426 ادام جاراقات الدى.