تۇركيانىڭ ءزىلزالا بولعان اۋماعىنان قازاقستان ازاماتتارىن ەلگە جەتكىزۋ جۇمىستارى جۇرگىزىلۋدە

استانا. قازاقپارات - تۇركيانىڭ وڭتۇستىك- شىعىسىنداعى الاپات جەر سىلكىنىسىنەن كەيىن گازياتەپ قالاسىنان قازاقستان ازاماتتارىن ەلگە الىپ كەتۋ شارالارى جۇرگىزىلۋدە، دەپ حابارلايدى قازاقپارات تۇركياداعى قازاقستان ەلشىلىگىنە سىلتەمە جاساپ.

«قازاقستانعا قايتامىن دەگەن ق ر ازاماتتارى 7-اقپان ساعات 12:00 گازيانتەپ قالاسىنىڭ اۋەجايىندا ءتيىستى پروتسودۋرادان ءوتىپ دايىن بولۋى ءتيىس. سونىمەن قاتار قازاقستانعا ورالۋعا نيەتتى ازاماتتار ءتىزىمىن جاساۋ ءۇشىن 905388807041، 903124919100 تەلەفون نومەرلەرىنە حابارلاسۋى كەرەك»، - دەلىنگەن ەلشىلىك تاراتقان حابارلامادا.

ايتا كەتەيىك، قازاقستان توتەنشە جاعدايلار مينيسترلىگىنىڭ قۇتقارۋشىلارى جەر سىلكىنىسى سالدارىن جويۋعا كومەك كورسەتۋ ءۇشىن الماتىدان تۇركياعا اتتاندى.

ونىڭ قۇرامىندا قازاقستاننىڭ رەسپۋبليكالىق جەدەل قۇتقارۋ جاساعىنىڭ قۇتقارۋشىلارى، مەديتسينالىق قىزمەتكەرلەر جانە قۇتقارۋشى يتتەر بار.

ءتيىستى تاپسىرمانى قازاقستان پرەزيدەنتى قاسىم- جومارت توقايەۆ بەردى. بورت ءبىرىنشى كەزەكتە گازيانتەپ قالاسىنا بارادى.

سوڭعى مالىمەت بويىنشا، تۇركيادا ءزىلزالا قۇرباندارىنىڭ سانى 3 مىڭعا جەتتى.

تۇركيا پرەزيدەنتى رەجەپ تايىپ ەردوعان ەلدىڭ وڭتۇستىك- شىعىسىندا بولعان جويقىن جەر سىلكىنىسىنە بايلانىستى 12-اقپانعا دەيىن جەتى كۇندىك ۇلتتىق ازا تۇتۋ جاريالادى.