تۇركياعا اتتانعان قازاقستاندىق قۇتقارۋشىلار قانشا كۇنگە دەيىن اۆتونومدى جۇمىس ىستەي الادى

استانا. قازاقپارات – ق ر توتەنشە جاعدايلار جونىندەگى ءبىرىنشى ۆيتسە-ءمينيسترى يبراگيم قۇلشىمبايەۆ تۇركياعا كومەككە اتتانعان قازاقستاندىق قۇتقارۋشىلاردىڭ قالاي جۇمىس ىستەيتىنىن ءتۇسىندىردى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسى مەن ت ج ءمينيسترىنىڭ بۇيرىعىنا سايكەس، ارنايى توپ تۇركيا رەسپۋبليكاسىنا قۇتقارۋ وپەراتسيالارىن ۇيىمداستىرۋ ءۇشىن بارا جاتىر. بۇل توپتا 41 قۇتقارۋشى بار، ونىڭ ىشىندە ۇزدىك قۇتقارۋشىلار، دارىگەرلەر، ارنايى قىزمەتتىك يتتەر بار. قۇتقارۋ-ىزدەستىرۋ جۇمىستارىنا ارنالعان جابىقتارىمىز جەتكىلىكتى»، - دەدى يبراگيم قۇلشىمبايەۆ الماتى اۋەجايىندا بەرگەن سۇحباتىندا.

سونىمەن بىرگە ارنايى ۇشاققا قۇتقارۋ جۇمىستارىنا ارنالعان كاماز، ۋاز جانە گازەل ماركالى ءۇش اۆتوموبيل تيەلگەن. ۇشۋ ۋاقىتى شامامەن 5 ساعات 40 مينۋت.

تۇركياداعى قازاقستان رەسپۋبليكاسى ەلشىلىگىنىڭ حابارىنشا، قۇتقارۋشىلار ۇشاعى گازيانتەپ قالاسىنا قونادى.

«تۇركيادا 14 كۇنگە دەيىن اۆتونومدى جۇمىس ىستەۋگە دايىنبىز. ول ءۇشىن قۇرالدارىمىز، تاماقتارىمىز، دارىلەرىمىزدى، ءبارىن اپارا جاتىرمىز. ءبىزدى تۇركياداعى قازاقستان رەسپۋبليكاسىنىڭ ەلشىلىگى كۇتىپ الادى، ولار قاي قالادا، قاي كەزدە جۇمىستى باستاۋ كەرەگىن ايتادى. ءبىزدىڭ قۇتقارۋشىلارىمىز وسى قويىلعان بۇيرىقتى اتقارۋعا دايىن»، - دەدى ي. قۇلشىمبايەۆ.

تۇركياداعى قازاقستان رەسپۋبليكاسى ەلشىلىگىنىڭ حابارىنشا، قۇتقارۋشىلار انكارا ارقىلى گازيانتەپ قالاسىنا بارادى.

مەملەكەت باسشىسى قاسىم-جومارت توقايەۆ تۇركيا پرەزيدەنتى رەجەپ تايپ ەردوعانعا كوڭىل ايتتى جانە ۇكىمەتكە تۇركياعا شۇعىل كومەك كورسەتۋدى تاپسىردى.

س ءى م مالىمەتى بويىنشا، قازىرگى ساتكە دەيىن وندا قازاقستان ازاماتتارى زارداپ شەكتى دەگەن اقپارات كەلىپ تۇسكەن جوق. سوڭعى مالىمەت بويىنشا تۇركيادا ءزىلزالا قۇرباندارىنىڭ سانى 3 مىڭعا جەتتى.

فوتو: قازاقستان ت ج م باسپا ءسوز قىزمەتى