تىزە اۋىرۋىن قالاي جەڭىلدەتۋگە بولادى؟
ءارتۇرلى اۋرۋلاردىڭ بەلگىلەرى ءبىر- بىرىنە ۇقساس كەلەدى، تىزە اۋرۋىن ءتيىمدى ەمدەۋ ءۇشىن ونىڭ سەبەبىن دۇرىس انىقتاۋ كەرەك.
تىزە ءارتۇرلى سەبەپپەن اۋىرۋى مۇمكىن، ءبىراق ول ءجيى مىنالارمەن بايلانىستى بولادى:
- سۇيەك سىنعان نەمەسە زاقىمدالعان؛
- تىزەنىڭ ۇرشىق سۇيەگى سىنعان نەمەسە جىلجىعان (قوزعالعاندا جانە تىزە بۇگىلگەندە اۋىرادى)؛
- تىزە بۋىنىنداعى ىشكى جانە سىرتقى شەمىرشەك ۇزىلگەن (تىزەنىڭ ارتقى جاعى اۋىرادى)؛
- ءسىڭىر نەمەسە بايلام قابىنعان نەمەسە سوزىلعان (تىزە بۇگىلگەندە اۋىرادى).
سونداي-اق تىزە مايتابان، ومىرقاارالىق ديسكتەر جارىعى، ۆاريكوز نەمەسە جامباس بۋىنى زاقىمى سەبەبىنەن دە اۋىرۋى مۇمكىن.
تىزە اۋىرۋىنىڭ سەبەبى ءجيى زاقىمدار بولادى. مىسالى، بەلسەندى سپورتپەن اينالىسۋ كەزىندە ىڭعايسىز قوزعالىپ قالىپ، تىزەنىڭ ۇرشىق سۇيەگى ورنىنان جىلجىپ كەتۋى نەمەسە شەمىرشەك زاقىمدالعان بولۋى مۇمكىن.
سونداي-اق، بۋىننىڭ سوزىلمالى اۋرۋى، مىسالى، تىزە بۋىنى ارتروزىنىڭ سەبەبىنەن تىزەڭىز اۋىرۋى مۇمكىن.
تىزە اۋىرعاندا، اسىرەسە، باستاپقى كەزەڭدەردە تراۆماتولوگ، ورتوپەد، نيەۆروپاولوگ، ريەۆماتولوگ نەمەسە وستەوپاتقا قارالۋعا بولادى.
تىزە اۋىرعاندا نە ىستەۋگە بولادى؟
تىزە اۋىرۋىن ەلەمەي قويۋعا بولمايدى. مىندەتتى تۇردە دارىگەرگە قارالۋ كەرەك. الايدا دارىگەرگە بارعانعا دەيىن ونىڭ اۋىرۋىن جەڭىلدەتۋ ءۇشىن مىنا ادىستەردى بايقاپ كورىڭىز:
- ەگەر تىزەڭىزدىڭ اۋىرۋى فيزيكالىق جۇكتەمەمەن بايلانىستى بولسا، سپورتپەن اينالىسۋدى توقتاتۋ نەمەسە ءۇزىلىس الۋ ۇسىنىلادى. تىزە استىنا جاستىق قويىپ جاتىڭىز؛
- ۇيدە تىزە اۋىرۋىن مۇزدىڭ كومەگىمەن جەڭىلدەتۋگە بولادى. ول ءۇشىن اۋىرىپ تۇرعان تىزەگە مۇز نەمەسە سالقىن بىردەڭە باسىڭىز. مۇنداي سالقىن كومپرەستى 10-20 مينۋت ۇستاۋعا بولادى؛
- تىزە اۋىرعاندا ونى سوزىلمالى بينتپەن وراۋعا بولادى، ءبىراق قىسىپ جىبەرۋگە بولمايدى؛
- اياقتى كوتەرىپ جاتىڭىز؛
- دارىگەرگە بارعانشا تىزەگە اۋىرسىنۋدى باساتىن جاقپا ماي جاعۋعا بولادى.
ەسكەرتۋ: تىزە اۋىرۋىنىڭ سەبەپتەرى مەن ونى ەمدەۋ جولىن تەك دارىگەر انىقتاي الادى.
