سەرىك جۇمانعارين باعانىڭ ءوسۋى ءورشىپ تۇرعان وڭىرلەردى اتادى

استانا. قازاقپارات - قاڭتاردا ينفلياتسيا 1,1 پايىزدى قۇرادى. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين ايتتى، دەپ حابارلايدى قازاقپارات ءتىلشىسى.

«وسى جىلدىڭ قاڭتار ايىنىڭ قورىتىندىسىندا ينفلياتسيا 1,1 پايىزدى، ونىڭ ىشىندە ازىق- تۇلىككە - 1,4, ازىق-تۇلىك ەمەس تاۋارلارعا - 0,9, اقىلى قىزمەتتەرگە 0,7 پايىزدى قۇرادى. ازىق-تۇلىك ينفلياتسياسىنىڭ ەڭ جوعارى دەڭگەيى استانا جانە شىمكەنت قالالارىندا - 2,2، قىزىلوردا جانە سولتۇستىك قازاقستان وبلىستارىندا - 1,8، اقتوبە وبلىسىندا - 1,7، ۇلىتاۋ وبلىسىندا 1,5 پايىز بولدى. الەۋمەتتىك ماڭىزى بار ازىق-تۇلىك تاۋارلارى باعاسىنىڭ يندەكسى جىل باسىنان 1,7 پايىزدى قۇراپ وتىر. اپتالىق ديناميكا 0,3+، 0,4+ پايىز بولىپ قالىپتاسۋدا»، - دەدى ول.

ونىڭ اتاپ وتۋىنشە، جىل باسىنان بەرى ەڭ جوعارى ءوسۋ قارقىنى ماڭعىستاۋ وبلىسىندا - 3,4، ۇلىتاۋ وبلىسىندا - 2,8 جانە استانا قالاسىندا 2,5 پايىز دەڭگەيىندە بايقالدى.

«تاۋارلار بولىنىسىندە جىل باسىنان ەڭ جوعارى ءوسىم پيازعا - 22,5، كۇرىشكە - 5,2، قىرىققاباتقا - 4,1، ءسۇت جانە سابىزگە - 3,1، كارتوپ – 3، ماكارون ونىمدەرىنە 2,6 پايىزدى قۇردى»، - دەدى سەرىك جۇمانعارين.