تۇركياداعى جەر سىلكىنىسى: ادانا اۋەجايى جۇمىسىن توقتاتتى، كەيبىر اۋدانداردا ەلەكتر قۋاتى ءۇزىلدى
سوڭعى جەراستى دۇمپۋلەرى سالدارىنان ديارباكىرداعى ءبىر عيمارات تىكەلەي ەفيردە وپىرىلىپ قۇلادى. وسىنىڭ سالدارىنان جەرگىلىكتى تۇرعىندار مەن جۋرناليستەر قازا تابا جازدادى. قۇتقارۋ جۇمىستارىن توقتاتۋعا، وقيعا ورنىن قورشاۋعا تۋرا كەلدى.
ەكى مارتە بولعان جەر سىلكىنىسىنەن كەيىن تۇركيانىڭ وڭتۇستىك-شىعىسىنداعى ادانا اۋەجايىنداعى رەيستەر توقتاتىلدى. جۇمىستى توقتاتۋ تۋرالى شەشىمدى كاحرامانماراشتاعى بىرنەشە رەت بولعان جەر سىلكىنىسىنەن كەيىن اۋە ايلاعىنىڭ باسشىلىعى قابىلدادى. ونىڭ ماگنيتۋداسى 7,6 بال بولدى.
تاسس اگەنتتىگىنىڭ حابارلاۋىنشا، رەسپۋبليكادا دابىلدىڭ ەڭ جوعارى دەڭگەيى جاريالاندى. ول حالىقارالىق كومەكتى قاراستىرادى.
«جاھاندىق سەيسميكالىق بەلسەندىلىكتىڭ دەڭگەيى توتەنشە دەڭگەيگە كوتەرىلدى جانە ءالى دە ءىرى جەر سىلكىنىسى بولۋى مۇمكىن»، - دەدى سەيسمولوگتەر.
تۇركيانىڭ يسكەندەرۋن پورتى دا قيراپ، ۋاقىتشا جۇمىسىن توقتاتتى.
سونداي-اق، جەر سىلكىنىسى سالدارىنان تۇركيانىڭ وڭتۇستىگىندەگى كەيبىر ايماقتاردا ەلەكتر قۋاتى مەن ينتەرنەتتىڭ ۇزىلگەنى حابارلاندى. مۇنداي دەرەكتەردى NetBlocks حالىقارالىق كوممەرتسيالىق ەمەس ۇيىمى كەلتىردى.
تۇركياداعى قۇتقارۋ جۇمىستارىمەن 9 مىڭ ادام اينالىسىپ جاتىر.
ەستەرىڭىزگە سالا كەتەيىك، تۇركيانىڭ وڭتۇستىك-شىعىسىنداعى كاحرامانماراش پروۆينتسياسىنىڭ پازاردجيك ايماعىندا 7,4 ماگنيتۋدالى جەر سىلكىنىسى بولدى. 912 ادام قازا تاۋىپ، 5385 ادام جاراقات الدى. تۇركياداعى جەر سىلكىنىسى كەزىندە قازا تاپقان جانە زارداپ شەككەن قازاقستان ازاماتتارى جوق.
قازاقستان پرەزيدەنتى قاسىم-جومارت توقايەۆ تۇركيا باسشىسىنا كوڭىل ايتتى. سونداي-اق ول ۇكىمەتكە تۇركياعا شۇعىل كومەك كورسەتۋدى تاپسىردى.
