تاسقىن سۋ ورتاسىندا قالعان جۇكتى ايەل مەن بالانى اۋىل اكىمى بەلىنە ارقان بايلاپ الىپ شىقتى

تۇركىستان. قازاقپارات - تاسقىن سۋ ورتاسىندا قالعان جۇكتى ايەل مەن بالانى اۋىل اكىمى بەلىنە ارقان بايلاپ قاۋىپسىز جەرگە الىپ شىقتى، دەپ حابارلايدى قازاقپارات ءتىلشىسى.

وقيعا بۇگىن بايدىبەك اۋدانىندا بولعان. شايان- مىڭبۇلاق وبلىستىق ماڭىزى بار اۆتوجولمەن كەلە جاتقان «ۆاز-2106» اۆتوكولىگى قىردان اققان اعىن سۋدىڭ اسەرىنەن جولدان شىعىپ كەتكەن. اۆتوكولىك ىشىندە 39 جاستاعى ەر ازامات جانە 33 جاسار جۇكتى ايەل مەن 7 جاسار بالا بولعان. ولار قورىققانىنان كولىك ۇستىنە شىعىپ، كولىكتى پانالاعان.

بۇل جايىندا تۇسىرىلگەن ۆيدەو الەۋمەتتىك جەلىدە دە تارادى. وندا ادامداردى كولىكپەن بىرگە سۋ اعىزىپ بارا جاتقانىن كورۋگە بولادى. جاعادا تۇرعاندار قۇتقارۋعا ارەكەتتەنىپ، كومەك بەرەدى. كەڭەس بويىنشا ولاردىڭ ءبىرى سۋعا سەكىرەدى. الايدا ول ءبىرشاما جەرگە اعىپ كەتكەن.

«كەيىن ماشينا ۇستىندەگى قالعان ايەل مەن بالانى مىڭبۇلاق اۋىلدىق وكرۋگىنىڭ اكىمى عالىمجان اكىمبايەۆ بەلىنە ارقان بايلاپ سۋ ورتاسىنان الىپ شىقتى. قازىر ولار اۋداندىق ورتالىق اۋرۋحاناعا جاتقىزىلعان. دارىگەرلەر باقىلاۋىندا» - دەيدى بايدىبەك اۋدانى اكىمدىگى تاراتقان اقپاراتتا.

بۇگىن، 2 -اقپان كۇنى ساعات 08:00-دەن باستاپ تاۋلى اۋدانداردا قار ەرىپ، جاۋىن- شاشىننىڭ كوپ تۇسۋىنە بايلانىستى سۋ دەڭگەيى كوتەرىلگەنىن جازدىق. سالدارىنان كەنتاۋ جانە تۇركىستان قالالارىندا جانە بايدىبەك، ورداباسى جانە ساۋران اۋداندارىندا اۋلالار مەن كوشەلەر سۋ استىندا قالدى.

سونداي- اق تاسقىن سۋ ساۋران اۋدانىنداعى ەلدى مەكەندەرگە قاۋىپ ءتوندىرىپ تۇرعانى حابارلاندى.

تۇركىستان وبلىسىنىڭ ءۇش اۋدانىندا 6 كوشەنى سۋ باسقانى ايتىلدى.

تۇركىستان وبلىسىنىڭ اكىمى تاسقىن سۋ كىرگەن ەلدى مەكەن تۇرعىندارىمەن كەزدەستى.

كەنتاۋ قالاسى مەن ساۋران اۋدانىندا توتەنشە جاعداي جاريالانۋى مۇمكىن.

اۆتور

قايرات زاينيشيەۆ