اسكەريلەر تۇركىستان وبلىسىنداعى سۋ باسۋ قاۋپىنە قارسى شارالارعا تارتىلدى

تۇركىستان. قازاقپارات - تۇركىستاندىق اسكەريلەر وڭىردەگى سۋ باسۋ قاۋپىنە قارسى شارالارعا تارتىلدى، دەپ حابارلايدى قازاقپارات قورعانىس مينيسترلىگىنە سىلتەمە جاساپ.

قاردىڭ كۇرت ەرۋى ارىس قالاسى مەن كوپتەگەن اۋىلداردى جاعالاي اعىپ جاتقان ارىس وزەنىنە قۇياتىن كابىلساي كانالىنىڭ ارناسىنان تاسۋىنا اكەلگەن. ەلدى مەكەندەردى سۋ باسۋ قاۋپىنە بايلانىستى ارىس قالاسى اكىمدىگىنىڭ، اۋداندىق توتەنشە جاعدايلار ءبولىمىنىڭ باسشىلىعى، اۋىلدىق وكرۋگتەردىڭ اكىمدەرى سۋ تاسقىنىنا قارسى شارالار ۇيىمداستىرىپ جاتىر.

«وعان قارۋلى كۇشتەردىڭ 44859 اسكەري ءبولىمىنىڭ ءجۇز ساربازى، №7 ءورت ءسوندىرۋ ءبولىمىنىڭ جەكە قۇرامى، «جاسىل ارىس» ك م م ماماندارى، جاستار رەسۋرستىق ورتالىعىنىڭ ەرىكتىلەرى جۇمىلدىرىلدى. قازىرگى ۋاقىتتا اۋىلدىق وكرۋگتەرگە جانە سۋ باسۋ قاۋپى بار ايماقتارعا جىبەرىلەتىن 2 مىڭ قاپ قۇم دايىندالدى»، - دەپ جازدى ۆەدومستۆودان.

ايماق باسشىلىعى ورىن العان جاعدايدى باقىلاۋدا ۇستاۋدا. كەزەكشى بەكەتتەردە وزەن اعىسى مەن سۋ دەڭگەيىن باقىلاۋ جۇزەگە اسىرىلاتىن بولادى.