ەلوردا ىرگەسىندەگى ەلدى مەكەندە ۇرلىق ءورشىپ تۇر

استانا. قازاقپارات - جۇرتتىڭ جەرگىلىكتى پوليتسەيلەرگە كوڭىلى تولمايدى.

اقمولا وبلىسىنىڭ قوسشى قالاسىندا ۇرلىق كوپ. تۇرعىندار كەزەكشىلىك ۇيىمداسىپ، ۇيلەرىن وزدەرى كۇزەتۋگە ءماجبۇر. ويتكەنى پوليتسەيلەردەن كوڭىلىمىز قالدى دەيدى.

سوڭعى ۋاقىتتا قوسشىعا قونىستانۋشىلاردىڭ قاتارى ەداۋىر ارتقان. قازىر سولاردىڭ دەنى ۇرىنىڭ قۇربانىنا اينالىپ وتىر. مىسالى، بىرنەشە اي بۇرىن ديليارا كاۋكەنوۆا اتتى تۇرعىننىڭ ۇيىنە دەپ اكەلگەن قۇرىلىس زاتتارىن ۇرلاپ كەتكەن. كەلتىرىلگەن شىعىن شامامەن 1 ميلليون تەڭگەدەن اسادى ەكەن.

ۇرى ەسىكتى بۇزىپ كىرگەن. قۇرىلىس ماتەريالدارى مەن توق سىمدارىن ۇرلادى. پوليتسيا شاقىردىق. ءبىراق پوليتسيا بىزگە «ارىز جازباڭىزدار، ايتپەسە پوليتسياعا قايتا- قايتا شاقىرا بەرەدى، ونى قايتەسىزدەر، كەتكەن زات كەتتى، تابىلمايدى» دەپ كەڭەس بەردى، - دەيدى ديليارا كاۋكەنوۆا.

وسى ماسەلە بويىنشا جينالىپ، «استانا» تەلەارناسىنا شاعىمدانعان وزگە دە جۇرت جەرگىلىكتى پوليتسەيلەرگە كوڭىلى تولمايتىندارىن ايتقان.

ءبىر ايدا 4 ۇرلىق بولدى. ال 4 ايدا 10 ۇرلىق بولىپ وتىر. ءبىر ادامدى دا تاۋىپ جاتقان جوق. بىزگە پوليتسەيلەر جەتىسپەيدى. ولار بىزدە شتات از دەپ سىلتاۋراتادى. ءبىراق ءبىزدىڭ نە كىنامىز بار؟ ءومىرىمىزدى قالاي ساقتايمىز؟ سونى پوليتسەيلەرگە جەتكىزە الماي وتىرمىز، - دەيدى كەلەسى تۇرعىن ايكەنجە ءالمۇقانوۆا.

ال پوليتسەيلەر وزدەرىنىڭ جۇيەلى تۇردە جۇمىس جۇرگىزىپ جاتقاندارىن العا تارتىپ وتىر. بىلتىر ۇرلىققا قاتىستى 25 جاعداي تىركەلگەن.

بارلىق فاكتى بويىنشا سوتقا دەيىنگى تەرگەۋ جۇمىستارى باستالدى. قابىلدانعان شارالاردىڭ نەگىزىندە 8 پاتەر ۇرلىعى اشىلىپ، كىنالىلەر جاۋاپقا تارتىلدى. قالعان قىلمىستار بويىنشا كۇدىكتىلەردى انىقتاۋ جەدەل ىزدەستىرۋ ءىس-شارالارى جۇرگىزىلىپ جاتىر، - دەدى اقمولا وبلىسى پ د باسپا ءسوز قىزمەتىنىڭ جەتەكشىسى گۇلنارا تەمىرحان قىزى.

ال تۇرعىندار قورقىنىش سەيىلۋ ءۇشىن كوشەلەر جارىقتاندىرىلسا جانە بەينەكامەرالار ورناتىلسا دەيدى.