18:19, 01 - اقپان 2023 | GMT +6
سولتۇستىك پەن شىعىسقا «سارىارقا» گاز ماگيسترالى سوزىلماق
استانا. قازاقپارات - ەنەرگەتيكا ءمينيسترى بولات اقشولاقوۆ ۆەدومستۆونىڭ كەڭەيتىلگەن القا ماجىلىسىندە ەلدىڭ سولتۇستىگى مەن شىعىسىن كوگىلدىر وتىنمەن قامتاماسىز ەتۋدىڭ ىقتيمال جولدارىن اتادى، دەپ حابارلايدى قازاقپارات ءتىلشىسى.
«ەلدىڭ سولتۇستىك جانە شىعىس وڭىرلەرىن گازداندىرۋعا قاتىستى بىرنەشە نۇسقالار پىسىقتالۋدا، اتاپ ايتقاندا: «سارىارقا» ماگيسترالدىق گاز قۇبىرىنىڭ 2- جانە 3- كەزەڭدەرىن سالۋ جانە رەسەي فەدەراتسياسىمەن پاۆلودار قالاسىنا تارماقتالعان «بارناۋل- رۋبتسوۆسك- سەمەي- وسكەمەن» ماگيسترالدىق گاز قۇبىرىن سالۋ بويىنشا كەلىسسوزدەر جۇرگىزىلۋدە»، - دەدى بولات اقشولاقوۆ.
سونداي- اق ول وسكەمەنگە تارماقتالاتىن «ومبى- پاۆلودار- سەمەي» گاز قۇبىرىن سالۋ مۇمكىندىگى قاراستىرىلىپ جاتقانىن ەسكە سالدى.
«بۇل رەتتە گازدىڭ رەسۋرستىق بازاسى جانە يمپورتتىق گازدىڭ قۇنى ماسەلەسى تەجەۋشى فاكتور بولىپ تابىلادى. وسى باعىتتاعى جۇمىس جالعاسادى»، - دەدى مينيستر.