دەپوزيت بويىنشا بازالىق مولشەرلەمە وزگەرىسسىز قالادى. بۇل نەنى بىلدىرەدى؟

استانا. قازاقپارات - قازاقستاندا دەپوزيت بويىنشا ەڭ جوعارى مولشەرلەمە بەكىتىلدى. دەپوزيتكە كەپىلدىك بەرۋ قورى (ق د ك ب ق) دەپوزيت بويىنشا سىياقىنىڭ شەكتى مولشەرلەمەسىن ناۋرىزعا دا ساقتاپ قالدى.

Massaget.kz ءتىلشىسى ەكونوميست ماقسات سەرالىمەن سۇحباتتاسىپ، بازالىق مولشەرلەمە نەنى بىلدىرەتىنىن، بۇل وزگەرىس قالاي اسەر ەتەتىنىن سۇرادى.

«2023-جىلعى ناۋرىزداعى دەپوزيت بويىنشا شەكتى مولشەرلەمە وزگەرىسسىز قالدى جانە اقپانداعى مولشەرلەمە دەڭگەيىندە ساقتالدى»، - دەلىنگەن حابارلامادا.

قور وكىلدەرى ەكىنشى دەڭگەيدەگى بانكتەر دەپوزيت ونىمدەرى بويىنشا سىياقى مولشەرى جايىندا ءوز بەتىنشە شەشىم قابىلدايتىنىن مالىمدەدى.

دەپوزيتتىڭ ءتۇرى مەن مەرزىمدىلىگىنە سايكەس ق د ك ب ق شەكتى مولشەرلەمەسى مىنا كەستەدە كورسەتىلگەن:

ەكونوميست بازالىق مولشەرلەمە ىشكى نارىقتاعى وزگەرىسكە تىكەلەي بايلانىستى ەكەنىن ءتۇسىندىردى.

«قازاقستان ەكونوميكاسى نارىقتىق ەكونوميكاعا جاتادى. نارىقتىڭ وزىندىك زاڭدىلىقتارى بار. ەڭ نەگىزگى نارىقتى قاداعالاۋشى جانە نارىقتى باقىلاۋشى ورگان - قازاقستان رەسپۋبليكاسىنىڭ ۇلتتىق بانكى. ۇلتتىق بانكتىڭ نەگىزگى قۇرالدارىنىڭ ءبىرى - بازالىق مولشەرلەمەنى بەكىتۋ. 2022-جىل وڭاي جىل بولعان جوق. بىرنەشە داعدارىس بولدى، سونىڭ ىشىندە ەكونوميكالىق داعدارىس، اقشانىڭ قۇنسىزدانۋى، تەڭگەنىڭ قۇنسىزدانۋى. وسىنىڭ الدىن الۋ جانە تۇراقتاندىرۋ ماقساتىندا ۇلتتىق بانك بازالىق مولشەرلەمەنى بىرنەشە رەت كوتەردى. قازىر بازالىق مولشەرلەمە - 16,75. بازالىق مولشەرلەمەگە بىرنەشە فاكتور تىكەلەي بايلانىستى. ەكىنشى دەڭگەيلى بانكتەردىڭ حالىققا بەرەتىن نەسيە مولشەرى جانە حالىقتان الاتىن دەپوزيت مولشەرى. ەكىنشى دەڭگەيلى بانكتەر دەپوزيت مولشەرلەمەسىن ءارتۇرلى، ماسەلەن، 17 پايىزدان 20 پايىزعا دەيىن كورسەتىپ جاتىر»، - دەيدى ساراپشى.

بۇل جاعداي ەكىنشى دەڭگەيلى بانكتەرگە دە اسەر ەتەدى.

«بازالىق مولشەرلەمە وزگەرگەن كەزدە نارىقتاعى ەكىنشى دەڭگەيلى بانكتەر وزدەرىنىڭ مولشەرلەمەسىن وزگەرتەدى. بازالىق مولشەرلەمە كوتەرىلگەن جاعدايدا وزدەرى شىعىنعا كەتپەۋى كەرەك. ويتكەنى ولاردا دا سىرتتان كەلەتىن قاراجات سول پايىزبەن، 16.75 پەن الىنادى. سوندىقتان ولار تابىس تابۋ، ءارى قاراي ول اقشانى كوبەيتۋ ءۇشىن ۇستىنە تاعى پايىز قوسادى. ءسويتىپ، حالىقتان اقشانى تارتۋ، ىنتالاندىرۋ بارىسىندا 16، 17، 18 پايىز دەگەن مولشەرلەمەسىن قويادى. بۇل جەردە، دەپوزيتكە كەلگەندە حالىق تابىس تابۋى كەرەك. نەسيەگە قاتىستى ايتار بولساق، ول وزگەرە باستايدى. ەكىنشى دەڭگەيلى بانكتەر ەڭ تومەنگى نەسيەنىڭ مولشەرلەمەسىن كوبەيتەدى»، - دەيدى مامان.

بازالىق مولشەرلەمە ۇنەمى وزگەرىپ وتىرمايدى. الايدا بۇل فاكتور تىكەلەي نارىق جاعدايىنا بايلانىستى كەيدە كوتەرىلىپ، كەيدە تومەندەيدى.

«2023-جىلى وزگەرمەيدى دەپ جاتقانىمىز، ويتكەنى بازالىق مولشەرلەمە بەكىتىلدى. ول اي سايىن وزگەرىپ تۇراتىن دۇنيە ەمەس. ول تەك قازاقستانداعى ىشكى نارىقتاعى ەكونوميكالىق جاعدايعا بايلانىستى وزگەرىپ تۇرادى. ەگەر تەڭگە قاتتى قۇلدىراسا، ينفلياتسيا، ديەۆالۆاتسيانىڭ الدىن الۋ ماقساتىندا بازالىق مولشەرلەمە كوتەرىلەدى نەمەسە تومەندەيدى. ال وڭتايلى ەكونوميكالىق جاعداي قالىپتاسسا، بيزنەستى نەسيەلەندىرۋ قارقىندى جۇرگىزىلسە، ەكونوميكانىڭ ىشكى نارىقتى قامتاماسىز ەتۋ پروتسەسى جوعارىلاسا، بازالىق مولشەرلەمە تومەندەۋى دە مۇمكىن. 16.75 تەن 16.5 كە ءتۇسۋى مۇمكىن. سوندىقتان بۇل نارىقتىق ەكونوميكاعا جانە ۇلتتىق بانككە بايلانىستى»، - دەيدى ەكونوميست.