مەملەكەت باسشىسى ۇيلەردى گازعا قوسۋ باعاسىنىڭ قىمباتتىعىن سىنعا الدى
پرەزيدەنت ماڭىزدى مىندەتتىڭ ءبىرى تۇراقتى ەلەكتر ەنەرگياسىمەن قامتاماسىز ەتۋگە قاتىستى بولىپ تۇرعانىن ايتتى. وسى ورايدا اكىمدىككە جالپى قۋاتتىلىعى 700 مەگاۆاتت بولاتىن قوسالقى ستانسالاردىڭ قۇرىلىسىن جەدەلدەتۋ تاپسىرىلدى.
سونىمەن قاتار قاسىم- جومارت توقايەۆ گاز جەلىلەرىن تارتۋ جۇمىستارىنا دا توقتالدى.
مەملەكەت باسشىسى 2019 -جىلى «سارىارقا» گاز قۇبىرىنىڭ ءبىرىنشى كەزەگى اياقتالعانىن اتاپ وتە كەلە، اكىمدىككە 300 مىڭنان استام ادام تۇراتىن تۇرعىن الابىنا گاز تارتۋ مىندەتى جۇكتەلگەنىن ايتتى.
بۇل تۇرعىدا پرەزيدەنت گاز جۇيەسىنە قوسۋ جۇمىستارىنىڭ باياۋ قارقىنىنا بايلانىستى ەكولوگيا ناشارلاپ جاتقانىن جەتكىزدى. ايازدى كۇندەرى كومىرمەن جاعىلاتىن پەشتەن شىققان ءتۇتىن قالانىڭ اۋماعىنا جايىلادى.
«بۇعان دەيىن ەلوردا اۋماعىنا تولىقتاي گاز تارتۋ جۇمىسىن اياقتاۋدى بىرنەشە رەت تاپسىرعان ەدىم. ءبىراق ونى ورىنداۋ مەرزىمى ۇنەمى كەيىنگە شەگەرىلىپ كەلدى. سوندىقتان، بۇل جاعدايدى تەز ارادا وزگەرتۋ كەرەك. ۇكىمەت پەن اكىمدىك وسى باعىتتاعى جۇمىستى كۇشەيتىپ، بەلگىلەنگەن مەرزىمىندە اياقتاۋى قاجەت. سونىمەن بەرگە، ۇكىمەت «سامۇرىق- قازىنا» قورىمەن بىرلەسىپ، ەلورداعا قاجەت كولەمدەگى گازدى قامتاماسىز ەتۋ ماسەلەسىن شەشۋى قاجەت»، - دەدى قاسىم- جومارت توقايەۆ.
بۇدان بولەك پرەزيدەنت تۇرعىنداردىڭ ۇيلەرىنە گاز تارتۋ قۇنى قىمباتقا ءتۇسىپ جاتقانىن ايتتى.
«بۇل قىزمەت ءۇشىن ەكى ميلليون تەڭگەگە دەيىن سۇرايدى ەكەن. وسىنداي جاعداي بارلىق ايماقتاردا دا قالىپتاسقان. ق ر باسەكەلەستىكتى قورعاۋ جانە دامىتۋ اگەنتتىگى ۇكىمەتپەن بىرلەسە وتىرىپ، تۇرعىنداردىڭ ۇيلەرىن گاز جۇيەسىنە قوسۋعا باعا بەلگىلەۋدىڭ اشىق ءارى تۇسىنىكتى بولۋىن قامتاماسىز ەتۋ بويىنشا ناقتى ۇسىنىس ەنگىزۋدى تاپسىرامىن»، - دەدى مەملەكەت باسشىسى.
