قاسىم- جومارت توقايەۆ: استانا كوشەلەرى كادىمگى مۇز ايدىنىنا اينالدى
«كەلەسى ماسەلە - قالانى اباتتاندىرۋ. بۇل جەردە ۇساق- تۇيەك دەگەن ماسەلە بولماۋى كەرەك، ءبارى - ماڭىزدى. وكىنىشكە قاراي، قالانىڭ كوركى قاشىپ بارادى. جولداردىڭ جيەگى تەگىس ەمەس، كەيبىر كوشەلەر تاس قاراڭعى. كوشە بويىنان قوقىس سالاتىن جاشىك تە تابىلماي جاتادى. قىستىگۇنى قالا ىشىندەگى قار ۋاقتىلى سىرتقا شىعارىلمايتىن كەزدەر دە بولادى. قار جاۋىپ، بوران سوقسا، تۇرعىندار قارعا مالتىعىپ جاتادى.
جاقىندا استانا كوشەلەرى بىرنەشە كۇن بويى كادىمگى مۇز ايدىنعا اينالدى. اباتتاندىرۋ جۇمىسىنا سوڭعى 3 جىلدا 45 ميلليارد تەڭگە ءبولىندى. سونداي- اق قالاداعى ۇيلەردىڭ اۋلاسى تۇگەل ءبىر قالىپپەن ەمەس، ءوز ەرەكشەلىگىمەن سالىنعانى ءجون.
ۋربانيستيكا سالاسىنىڭ ماماندارىمەن، ساۋلەتشىلەرمەن، تۇرعىندارمەن بىرلەسىپ، تىڭ، جاڭا تاسىلدەردى قولدانۋ قاجەت. مىسالى، اشىق بايقاۋ جاريالاپ، وزىق جوبالاردى تاڭداپ الۋعا بولادى. قالانىڭ كەلبەتىن اراكىمنىڭ تالعامى بويىنشا وزگەرتە بەرۋگە بولمايدى. ناقتى بەكىتىلگەن جوسپارمەن جۇيەلى تۇردە جۇمىس جۇرگىزۋ كەرەك»، - دەدى توقايەۆ.
سونداي- اق مەملەكەت باسشىسى قالا تۇرعىندارى قوقىستى بەيبەرەكەت لاقتىراتىنىن، جاستار كوشەدە بەيادەپ قىلىقتارعا باراتىنىن اتاپ ءوتتى.
«تاعى ءبىر ماڭىزدى ماسەلە. قالا تۇرعىندارىنىڭ تۇرمىستىق مادەنيەتى. استانانىڭ تازالىعى، ەڭ الدىمەن، ونىڭ تۇرعىندارىنا بايلانىستى. ءزاۋلىم ۇيلەردىڭ ىشىندەگى جانە سىرتىنداعى جاعداي ءماز ەمەس. شىندىعىن ايتساق، تۇرعىندار تۇرمىستىق ءتارتىپتى ءجيى بۇزادى، قوقىستى قالاي بولسا سولاي لاقتىرا بەرەدى. جاستار كوشەدە جۇرگەندە مادەنيەتسىز قىلىقتارعا جول بەرەدى. سوندىقتان، مەن مىنا ماسەلەگە ارنايى نازار اۋدارعىم كەلەدى.
ەلوردامىزدى جانە باسقا نەگىزگى قالالارىمىزدى دۇرىس قالپىندا ساقتاۋ بۇل - ۇلتتىق نامىسىمىزعا قاتىستى اسا ماڭىزدى ماسەلە. كوشپەندىلەردىڭ ۇرپاقتارى ءوز قالالارىن ءجوندى ساقتاي المايدى دەگەن جاعىمسىز پىكىردى مۇلدەم جوققا شىعارۋىمىز كەرەك»، - دەدى پرەزيدەنت.
