وقۋشىلارعا ماماندىق تاڭداۋعا كومەكتەسەتىن جوبا ىسكە قوسىلادى
بۇل تۋرالى قاۋىمداستىق كەڭەسىنىڭ مۇشەسى مۇحتار مانكەيەۆ ورتالىق كوممۋنيكاتسيالار قىزمەتىندە وتكەن بريفينگتە ايتتى، دەپ حابارلايدى قازاقپارات ءتىلشىسى.
«بۇگىن ءبىز رەسمي تۇردە «بولاشاق» قاۋىمداستىعىنىڭ اتىنان جاڭا جوبانى باستاعالى وتىرمىز. «بولاشاققا سەنىممەن» جوباسى مەكتەپ ءبىتىرىپ جاتقان تۇلەكتەرىمىزگە ءوزىنىڭ كاسىبي باعدارىن، كاسىبي جولىن تاڭداي بىلۋىنە ارنالعان ناقتى جوبا بولماق.
2022-جىلى ءبىز پيلوتتىق نەگىزدە 40 تان استام مەكتەپتە كەزدەسۋلەر وتكىزىپ، 3 مىڭنان استام وقۋشىنى قامتىدىق. ونىڭ ءبارى 10,11,12- سىنىپتاعى بولاشاق تۇلەكتەر. ماماندىق تاڭدا كەزىندە ولاردا قانداي تريگگەرلەر، قانداي ستيمۋلدار بولۋ كەرەكتىگىن «بولاشاق» مەنتورلارى ارقىلى ۇيرەتەمىز»، - دەدى قاۋىمداستىق وكىلى.
ايتۋىنشا، بۇل جوبا ناۋقاندىق شارا بولىپ قالماۋ ءۇشىن جۇيەلى تۇردە دامىتۋعا كۇش سالىنباق.
«2023-جىلى بولاشاققا سەنىممەن» دەگەن جوبانى «بولاشاق» تۇلەكتەرى قاۋىمداستىعىنىڭ اتىنان باستايىق دەپ جاتىرمىز. باستى مەنتورلار دەگەن توپ جاساقتاپ جاتىرمىز. وسى جوباعا قاتىسقىسى كەلەتىن ازاماتتاردى شاقىرامىز. بۇگىنگى بريفينگتى پايدالانىپ، وزدەرىن قوعام بەلسەندىسى دەپ بىلەتىن ازاماتتاردىڭ ءبارىن بىزگە جۇگىنىپ، بايلانىس مالىمەتتەرىن بەرگە شاقىرامىز. ۇيىمداستىرۋشىلار سول مالىمەتتەر بويىنشا كەرى حابارلاسىپ، كومەك بەرەدى. ولارمەن دە كەزدەسۋلەر وتكىزۋگە دايىن ەكەنىمىزدى ايتقىم كەلەدى»، - دەدى ول.
