مامىردا قازاقستاندىق لوۋكوستەر استانادان انكاراعا بيلەت ساتۋدى باستايدى
تۇركيا مەن قازاقستان استانالارىنىڭ اراسىن جالعايتىن بيۋجەتتىك رەيسكە بيلەتتەر 23- مامىردان باستاپ ساتىلۋى مۇمكىن. رەيس اپتانىڭ سەيسەنبى جانە سەنبى كۇندەرى ساعات 5.00 شاماسىندا ۇشادى دەپ جوسپارلانعان. لوۋكوستەر تاراتقان رەسمي مالىمەتتە بيلەتتىڭ ءبىر باعىتتاعى قۇنى 43560 تەڭگە كولەمىندە بولاتىنى دا ايتىلعان.
«2021-جىلى تۇركيا FlyArystan جەلىسىندەگى العاشقى حالىقارالىق باعىت بولدى. ەكى جىل ىشىندە ستامبۋل قازاقستاندىقتاردىڭ سۇيىكتى باعىتىنا اينالدى. سول سياقتى انكارا دا تۋريستەر مەن كاسىپكەرلەر ءۇشىن سۇرانىسقا يە باعىتقا اينالادى دەپ ۇمىتتەنەمىز. كومپانيا استانالىقتاردان بولەك الماتى، شىمكەنت، سەمەي، قىزىلوردا، اقتاۋ جانە باسقا دا قالالاردىڭ تۇرعىندارىنا تۇركيا قولجەتىمدى رەيس ۇسىنۋعا دايىن»، - دەيدى دەدى مارشرۋتتىق جەلىنى جوسپارلاۋ جونىندەگى ديرەكتور رەنات ءابىلحانوۆ.
ونىڭ ايتۋىنا قاراعاندا، Flyarystan-نىڭ حالىقارالىق باعىتتاعى بىرنەشە رەيسى قايتا قالپىنا كەلەدى.
«اۋە كومپانياسى فلوت ۇلعايعاندىقتان 2023-جىلدىڭ باسىنان باستاپ اقتاۋ - ەريەۆان، الماتى - سامارقاند سياقتى ءبىرقاتار حالىقارالىق باعىتتاردى قالپىنا كەلتىرىپ، الماتى مەن استانادان وسكەمەنگە ۇشاتىن باعىت بويىنشا بيلەت ساتۋدى باستادى»، - دەدى ول.
Air Astana ۇلتتىق تاسىمالداۋشىسىنىڭ قۇرامىنداعى لوۋكوستەر 2023-جىلدىڭ اياعىنا دەيىن فلوت قۇرامىن 19 ۇشاققا جەتكىزبەكشى.
بۇعان دەيىن استانا - انكارا اراسىندا تىكەلەي اۆيارەيس اشىلعانى تۋرالى حابارلاعان بولاتىنبىز.
