مامىردا ەلدەگى كيىك پوپۋلياتسياسىن زەرتتەۋگە حالىقارالىق ساراپشىلار كەلەدى
ورمان شارۋاشىلىعى جانە جانۋارلار الەمى كوميتەتىنىڭ باس ساراپشىسى اسقار ابدراحمانوۆ ۆەدومستۆونىڭ بريفينگىنەن كەيىن وسىنداي مالىمەت ايتتى، دەپ حابارلايدى قازاقپارات ءتىلشىسى.
«وسى اقپان جانە مامىر ايلارىندا حالىقارالىق ساراپشىلاردىڭ قاتىسۋىمەن جينالىستار وتەدى. مامىر ايى كيىكتەردىڭ اۋىل شارۋاشىلىعىنا ناعىز اسەر ەتەتىن كەزى بولىپ ەسەپتەلەدى. حالىقارالىق مامانداردى دا وسى ۋاقىتقا شاقىرىپ وتىرمىز»، - دەدى كوميتەتتىڭ باس ساراپشىسى.
ب ا ق وكىلدەرى بۇل جيىنداردان قانداي قورىتىندى شىعارىلۋى مۇمكىن ەكەنىن سۇرادى.
«ءسىز ايتىپ وتىرعان عالىمدار ەلدە كيىكتىڭ ءۇش پوپۋلياتسياسىن ءتالىمباقتا ءوسىرۋ قولعا الىنعانىن العا تارتىپ، كيىك اتۋعا قويىلعان شەكتەۋدىڭ كۇشىن جويۋ تۋرالى شەشىم قابىلداۋى مۇمكىن بە؟»، - دەپ سۇرادى جۋرناليست.
«مۇمكىن. ەندى ول عىلىمي ۇسىنىستارعا، عىلىمي جۇمىستاردىڭ شەشىمىنە بايلانىستى»، - دەدى ول.
ساراپشىنىڭ سوزىنە قاراعاندا، ەلىمىزدە كيىكتەردى قولعا ۇيرەتۋگە جارامدى ءتالىمباقتار بارشىلىق.
«جاڭگىر حان ۋنيۆەرسيتەتىنىڭ ءتالىمباعى، الماتى وبلىسىنداعى زوولوگيا ينستيتۋتىنىڭ ءتالىمباعى، قاراعاندى وبلىسىندا دا جاڭگىر حان ۋنيۆەرسيتەتىنىڭ ءتالىمباعى بار. قولعا ۇيرەتۋ جۇمىستارى ءۇش پوپۋلياتسيا بويىنشا جۇرگىزىلەدى. ياعني، باتىس قازاقستان، اقتوبە، قاراعاندى، اقمولا، قوستاناي وبلىستارىن قامتيدى دەگەن ءسوز»، - دەدى اسقار ابدراحمانوۆ.
