بيىل پاريجگە ساياحاتتاۋ ءۇشىن قانشا قاراجات قاجەت؟

استانا. قازاقپارات - فرانسياعا ءبىر اپتاعا ساياحاتتاۋعا بارىپ، ەيفەل مۇناراسىن كورۋ ءۇشىن قانشا شىعىن كەتەدى؟

شەنگەن ۆيزاسىن قالاي راسىمدەۋ كەرەك؟ ول ءۇشىن قانداي قۇجاتتار قاجەت؟ «ماحاببات قالاسىندا» قاي جەرلەرگە مىندەتتى تۇردە بارۋ كەرەك؟ Massaget.kz ءتىلشىسى بۇل سۇراقتارعا جاۋاپ ىزدەپ كورگەن.

ەۋروپا ەلدەرىنە بارۋ ءۇشىن الدىن الا دايىندالۋ قاجەت. ول ءۇشىن بىردەن بيلەت الۋدان باستاماڭىز، الدىمەن ۆيزا راسىمدەپ الۋ كەرەك. جيھانكەز، ساياحاتشى، بلوگەر رۋسلان مەدەلبەك Instagram-پاراقشاسىندا پاريجگە كەتەتىن شىعىندى ەسەپتەپ كورگەن ەكەن.

جيھانكەزدىڭ ايتۋىنشا، ءبىر اپتاعا بيلەت ىستامبۇل نەمەسە فرانكفۋرت ارقىلى 260 مىڭ تەڭگەگە شىعادى. بۇدان ارزان جولى، الماتىدان Pegasus نەمەسە تۇركىستان، شىمكەنتتەن Fly Arystan ارقىلى 50-60 مىڭعا الدىمەن ىستامبۇلعا جەتىپ الاسىز. ىستامبۇلدان لوۋكوستەرلەرمەن (ارزان اۋە كومپانياسى - ەسك.) پاريجگە 50-60 مىڭ تەڭگەمەن جەتۋگە بولادى.

قازىر الماتى- پاريج باعىتىنداعى رەيسكە بيلەتتى ءبىر ايىن بۇرىن الساڭىز، بيلەت 311 مىڭ تەڭگەگە شىعادى، ال لوۋكوستەرلەر ارقىلى الدىمەن ىستامبۇلعا، كەيىن پاريجگە جەتۋ 100-120 مىڭ تەڭگەگە شىعادى.

حوستەل نەمەسە قوناق ءۇي

رۋسلان مەدەلبەكتىڭ ايتۋىنشا، ءبىر اپتاعا پاريجدە حوستەلدەردەگى ءبىر ورىن 100 مىڭ تەڭگە (200 ەۋرو) بولادى.

بۇدان باسقا، قوناقۇيلەردەگى ءبىر كۇنگە ءبىر ورىن 100 مىڭ تەڭگەدەن باستالادى. دەمەك، ءبىر اپتاعا 500-700 مىڭ تەڭگەگە شىعادى. ال Airbnb پورتالى ارقىلى جالعا پاتەر العىڭىز كەلسە، 1 اپتاعا 180 مىڭ تەڭگە بولادى.

ۆيزا جانە ساقتاندىرۋ

ال ۆيزا مەن ساقتاندىرۋعا 60 مىڭ تەڭگە كەرەك. فرانسيا ەلىنە شەنگەن ۆيزاسىن الۋ 60 دوللار (28 مىڭ تەڭگە). ۆيزا الۋ ءۇشىن بىرنەشە قۇجات كەرەك. ول ءۇشىن قازاقستانداعى فرانسيا وكىلدىگىنە جۇگىنۋىڭىز قاجەت.

«ءبىر اپتادا پاريجدە تاماققا، قوعامدىق كولىككە 100 مىڭ تەڭگە جەتەدى. پاريجدىڭ بار سۇلۋلىعىن كورۋگە كەمى 520 مىڭ تەڭگە كەتەدى. ال ەستەلىككە كادەسىي الامىن، مۋزەي ارالايمىن، ەيفەل مۇناراسىنا شىعامىن دەسەڭىز شىعىن 600 مىڭ تەڭگەگە دەيىن كوبەيمەك»، - دەيدى بلوگەر.

سونداي-اق، بلوگەر «ماحاببات وتانىندا» قانداي جەرلەرگە مىندەتتى تۇردە بارۋ كەرەگىن ايتتى.

«پاريجگە ءبىر اپتاعا بارساڭىز ەيفەل مۇناراسىن، سالتانات قاقپاسىن (تريۋمف اركانى)، ۆەرسال، ساكرە- كەر بازيليگىن، نوتر-دام شىركەۋىن كورىپ، پاريجدىڭ اتموسفەراعا تولى ماڭعاز كوشەلەرىن ارالاپ، سەنا وزەنىنىڭ بويىندا پاريجدىڭ رومانتيكاسىن تولىق سەزىنىپ قايتاسىز»، - دەيدى ول.

ال «پاري سەن-جەرمەن» كلۋبىنىڭ ماتچىنە بيلەت 50 ەۋرودان باستالادى، تەڭگەگە شاققاندا 25 مىڭ تەڭگە.