پەرۋ پرەزيدەنتى دينا بولۋارتە بيلىكتەن كەتۋگە دايىن

دينا بولۋارتەنىڭ ايتۋىنشا، ەسىرتكى ساۋداگەرلەرى مەن كونترابانداشىلار وزدەرىنىڭ ساياسي ماقساتتارىن جۇزەگە اسىرۋ ءۇشىن ەلدە «حاوس» تۋدىرۋ ماقساتىندا «اسكەري كۇشتەردى» ۇيىمداستىرعان.

سونىمەن قاتار دينا بولۋارتە مەرزىمىنەن بۇرىن سايلاۋ كۇنى تاعايىندالعاننان كەيىن وتستاۆكاعا كەتۋگە نيەتتى ەكەنىن ايتتى.

«مەن قىزمەتكە كىرىسكەن العاشقى مينۋتتان باستاپ كونگرەسپەن بىتىمگە كەلۋگە شاقىردىم. ەندى ديالوگ قۇرىپ، ءار ايماقتىڭ كۇن ءتارتىبىن انىقتاۋ ءۇشىن سۇيىكتى ەلىمدى ۇلتتىق بىتىمگەرشىلىككە شاقىرامىن»، - دەدى دينا بولۋارتە.

پەرۋدەگى نارازىلىقتار جەلتوقساننىڭ باسىندا ەلدىڭ بۇرىنعى پرەزيدەنتى پەدرو كاستيلو قاماۋعا الىنعاننان كەيىن باستالدى.

نارازىلىق بىلدىرۋشىلەر ونىڭ ورنىنا كەلگەن دينا بولۋارتەنىڭ وتستاۆكاعا كەتۋىن، پارلامەنتتى تاراتۋدى، بيىل جالپى سايلاۋ وتكىزۋدى جانە كونستيتۋتسيالىق اسسامبلەيانى شاقىرۋدى تالاپ ەتىپ وتىر.

وسى ۋاقىت ارالىعىندا 50-دەن استام ادام قۇقىق قورعاۋ ورگاندارىمەن قاقتىعىستىڭ قۇربانى بولدى.

بۇعان دەيىن حۋلياكا قالاسىنداعى ۇكىمەتكە قارسى نارازىلىق شەرۋلەرىندە كەم دەگەندە 17 ادام قازا تاۋىپ، 52 ادام زارداپ شەككەنى حابارلانعان بولاتىن. پەرۋ پرەزيدەنتى ەلدەگى شەرۋلەرگە شەتەلدىك ارانداتۋشىلاردىڭ قاتىسى بار ەكەنىن مالىمدەدى. پەرۋدىڭ بىرنەشە ايماعىندا توتەنشە جاعداي رەجيمى جاريالانعان.

فوتو: xeber.media

اۆتور

سماعۇلوۆا ەركەجان