حالىقتى جالعان اقپاراتتان قورعاۋ ءۇشىن جۇيەلى جۇمىس اتقارىلۋى ءتيىس - التاي كولگىنوۆ

استانا. قازاقپارات - وڭىرلىك مەرزىمدى باسىلىمدار فورۋمىنا قاتىسقان پرەمەر- ءمينيستردىڭ ورىنباسارى التاي كولگىنوۆ مينيسترلىككە ايماقتارداعى بۇقارالىق اقپارات قۇرالدارىن دامىتۋ بويىنشا ءبىرقاتار تاپسىرما بەردى، دەپ حابارلايدى قازاقپارات ءتىلشىسى.

«ەگەر 2016 -جىلى قازاقستاندا 2 مىڭعا جۋىق ب ا ق تىركەلگەن بولسا، بۇگىندە 5 مىڭنان استى. ونىڭ 70 پايىزى باسپا مەن باسىلىمدار. بۇل - مەديا سالاسىنىڭ قارقىندى دامۋ الەۋەتىنىڭ ۇلعايعانى مەن ونىڭ بولشاعىنىڭ زور ەكەنىن دالەلدەيدى. وتاندىق مەديانىڭ الەۋەتىن ودان ءارى دامىتۋ ءۇشىن الدىمىزدا اۋقىمدى مىندەتتەر بار. مەملەكەت باسشىسى ءوزىنىڭ سايلاۋالدى باعدارلاماسىندا ەلىمىزدەگى اقپاراتتىق ساياساتتى، جاستار ساياساتىن، ازاماتتىق قوعاممەن بايلانىس قۇرالدارىن جاقسارتۋ بويىنشا ناقتى تاپسىرمالار بەرىپ، مىندەتتەر قويدى. وسى ورايدا، وڭىرلىك ب ا ق- تىڭ ماسەلەلەرىن: اتاپ ايتقاندا، وقىرمانداردىڭ سانى مەن باسىلىم تارالىمىن قايتا كوبەيتۋ، قارجىلاندىرۋ جانە تەحنيكالىق جاڭارتۋ، ۋاقىتىلى جەتكىزۋ مەن جەرگىلىكتى باق- تىڭ احۋالىن جاقسارتۋ باعىتىندا مينيسترلىك جەرگىلىكتى اتقارۋشى ورگاندارمەن بىرلەسە جۇمىس ىستەۋى كەرەك»، - دەدى التاي كولگىنوۆ.

سونىمەن قاتار، ۆيتسە- پرەمەر قازاقستاندىق مەديا كەڭىستىكتىڭ قاۋىپسىزدىگىن قامتاماسىز ەتۋ ماسەلەلەرىنە توقتالدى.

«ءار ايماقتاعى باسىلىمداردىڭ وزىندىك وڭىرلىك ەرەكشەلىكتەرىن ەسكەرە وتىرىپ، مەملەكەتتىك اقپاراتتىق ساياساتتى ءتيىمدى جۇرگىزۋ فورماتىن قالىپتاستىرۋ قاجەت. سالا ماماندارىن، بىلىكتى ساراپشىلاردى اقپاراتتىق ءتۇسىندىرۋ جۇمىستارىنا تارتۋ ماڭىزدى. تاعى ءبىر ماسەلە - وتاندىق مەديا كەڭىستىكتىڭ قاۋىپسىزدىگى. ەلىمىزدە زيان كەلتىرەتىن جالعان اقپاراتتان حالقىمىزدى قورعاۋ ماقساتىندا جۇيەلى جۇمىستار اتقارىلۋى ءتيىس»، - دەپ تۇيىندەدى ا. كولگىنوۆ.