س ق و-داعى اۋىلدا تۇرعىندار ون جىلدان بەرى اراق-شاراپتان باس تارتقان - فوتو

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، كوۆىلنوە ەلدى مەكەنى عابيت مۇسىرەپوۆ اتىنداعى اۋداندا ورنالاسقان.

405 تۇرعىنى بار اۋىلدا سوڭعى جىلدارى ءبىر دە ءبىر قىلمىس تىركەلمەگەن.

پوليتسيانىڭ ەسەبىندە تۇرعاندار دا جوق. اۋىل تۇرعىندارىنىڭ ايتۋىنشا، مۇنىڭ ءبىر سەبەبى - اراق-شاراپتان تۇبەگەيلى باس تارتۋ.

قازىر مۇندا دۇكەندەردە سپيرتتىك ىشىمدىكتەر ساتپايدى، ويتكەنى سۇرانىس جوق. ويىن-تويلار دا اراقسىز وتەتىن بولعان.

«بۇل اۋىلدا تۇرۋ قاۋىپسىز. تۇندە تىپ-تىنىش، بالالاردى دا ەش قورىقپاي ويناۋعا جىبەرە الامىز. باسقا اۋىلدا تۇرعاندا ەسىك الدىنا سۋ تولى ىدىستى قالدىرا المايتىنبىز. ويتكەنى، ۇرلاپ كەتەتىن. قازىر ءۇيدى دە ەش قورىقپاستان اشىق تاستاپ كەتە بەرۋگە بولادى»، - دەيدى كوۆىلنوە ەلدى مەكەنىنىڭ تۇرعىندارى.

ەلدى مەكەننىڭ قاۋىپسىز بولۋىنىڭ تاعى ءبىر سەبەبى - مۇنداعى كوشەلەرگە 130 بەينەكامەرا ورناتىلعان، بۇل - قوعامدىق ءتارتىپتى ساقتاۋدا ۋچاسكەلىك پوليتسيا ينسپەكتورىنا ۇلكەن كومەك.

«جۇمىسسىز قالعان جوقپىز. قۇقىق بۇزۋشىلىقتاردىڭ، ينتەرنەت الاياقتىقتىڭ الدىن الۋ ءۇشىن جۇمىس ىستەيمىز. وقۋشىلارمەن كەزدەسەمىز. اباتتاندىرۋ ەرەجەلەرىنىڭ ساقتالۋىن دا، مالدى بوس جىبەرمەۋىن دە باقىلاۋدا ۇستاۋ كەرەك.

ال قىلمىس نەگىزىنەن ماستىقتان جاسالادى. بۇل اۋىلدا ونداي جوق»، - دەيدى تاحتابرود اۋىلدىق وكرۋگىنىڭ ۋچاسكەلىك پوليتسيا ينسپەكتورى داۋلەت مولداحمەتوۆ.

جەرگىلىكتى كاسىپكەر سەرىك مالايەۆ بەينەكامەرالاردى ورناتۋدان بولەك، ەلدى مەكەننىڭ الەۋمەتتىك جاعدايىنا دا باسا نازار اۋدارادى.

سەرىكتەستىكتىڭ ەسەبىنەن بالالار مەكتەپتە تەگنى تاماقتانادى. جولدى دا ءوز قاراجاتىنا جوندەيدى، سپورتتىڭ دا دامۋىنا ۇلەس قوسىپ كەلەدى.

«سپيرتتىك ىشىمدىكتەن باس تارتقالى بەرى كاسىپورىندا دا ءتارتىپ بۇزۋ ساپ تىيىلدى. تۇسىنىسپەۋشىلىكتەر، جۇمىسقا كەلمەي قالۋ دەگەندەر بولمايدى. تۇرعىندار دا اۋىلدا جاقسى ءومىر ءسۇرۋى جانە ەرتەڭگى كۇندەرىنە سەنىمدى بولۋى ءۇشىن جۇمىس ىستەيمىز»، - دەيدى كاسىپكەر سەرىك مالايەۆ.

اۋىلداعى 405 تۇرعىننىڭ 120 سى قازىر اۋىلىنا جانى اشىعان كاسىپكەردىڭ قول استىندا، ج ش س-دە جۇمىس ىستەپ جاتىر.

اۆتور

اقەركە داۋرەنبەك قىزى