بريۋسسەلدە قازاقستان مەن ە و اراسىنداعى ەكىجاقتى قارىم-قاتىناس كەلەشەگى تالقىلاندى

ەۋروپا استاناسىندا قازاقستان وكىلى ەۋروپارلامەنت مۇشەلەرىمەن، ەۋروپالىق سىرتقى ارەكەت قىزمەتىمەن ءبىرقاتار كەزدەسۋ وتكىزدى.

ر. ۆاسيلەنكو بەلگياداعى قازاقستاندىق باق وكىلدەرىمەن مۇنداعى كەزدەسۋلەرىنىڭ مازمۇنى تۋرالى ايتىپ بەردى.

«بيىل قازاقستان مەن ەۋروپالىق وداق اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولادى. ناقتى كۇنى – 2- اقپان. كەزدەسۋلەرىمىزدىڭ ماقساتى وتكەن 2022-جىلى اتقارىلعان ىستەردى باعالاۋ بولدى. ەۋروپالىق ارىپتەستەرىمىز اتاپ وتكەندەي، بۇل ءبىزدىڭ قارىم-قاتىناستارىمىزدى دامىتۋدا بۇرىن-سوڭدى بولماعان قارقىندى جىل بولدى. ءبىز 2023-جىلدى دا لايىقتى وتكىزۋ، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پەن ەۋروپالىق وداق باسشىلىعى، دالىرەك ايتقاندا قازاقستانعا ساپارمەن كەلگەن ەۋروكەڭەس باسشىسى شارل ميشەل جانە ەۋروكوميسسيا پرەزيدەنتى ۋرسۋلا فون دەر ليايەن قول جەتكىزگەن بارلىق ۋاعدالاستىقتاردى جۇزەگە اسىرۋ ءۇشىن جاڭا جوسپارلار بەلگىلەدىك»، - دەدى رومان ۆاسيلەنكو.

ەۋروكوميسسيا باسشىسى قازاقستانعا بيىل ساپار جاساپ، قازاقستان رەسپۋبليكاسىنىڭ پرەمەر-ءمينيسترى ءا. سمايىلوۆپەن تۇراقتى شيكىزات، باتارەيالار جانە «جاسىل» سۋتەگى قۇنىنىڭ تىزبەگىن قۇرۋ سالاسىندا قول قويعان ىنتىماقتاستىق تۋرالى مەموراندۋمدى جۇزەگە اسىرۋ بويىنشا «جول كارتاسىنا» قول قويۋدى جوسپارلاپ وتىر.

قازاقستان ەۋروپالىق نارىققا مۇنايدىڭ %8-9 جۋىعىن جەتكىزەدى، ياعني ەۋروپالىق وداق ءۇشىن ەنەرگەتيكالىق رەسۋرستاردى ەڭ ماڭىزدى جەتكىزۋشىلەردىڭ ءبىرى.

قازاقستان-ەۋروپا اراسىنداعى پىكىرتالاستاردىڭ تاعى ءبىر تاقىرىبى - «ورتا ءدالىزدى» دامىتۋ. ياعني، قازاقستان مەن ەۋروپا اراسىندا كاسپي تەڭىزى، ازەربايجان، گرۋزيا جانە تۇركيا ارقىلى تىعىز بايلانىس ورناتۋ. بۇل تاقىرىپ بيىل دا ەكى جاقتىڭ نازارىندا بولماق.