قازاقستاندىق كاسىپكەرلەر وزبەكستان نارىعىنا كوپتەپ قارجى قۇيا باستادى

استانا. قازاقپارات - تاشكەنتتە قازاقستاندىق كومپانيالاردىڭ ءبىرى تۇرعىن ءۇي كەشەنىن سالۋعا كىرىسسە، ەندى ءبىرى كولىك- لوگيستيكالىق تەرمينالدىڭ ىرگەتاسىن قالادى. ال ناۋايدەگى مينەرالدى تىڭايتقىش شىعاراتىن زاۋىت جوباسىنا وتاندىق ينۆەستيتسيا قۇيىلدى.

وزبەكستاننىڭ ەڭبەك ميگرانتتارى تەك قازاقستاندا عانا ەمەس، رەسەي، كورەيا، تۇركياعا دا اتتانىپ، تابان اقى، ماڭداي تەرىمەن تابىس تاۋىپ ءجۇر. كەيبىرى وتانىنا قايتۋعا ءالى اسىق ەمەس. وزبەكستان ۇكىمەتىنە بۇل ءتيىمدى جاعداي.

زەينال گادجيەۆ، ورتالىق ازياداعى كوشى- قون ءىسى بويىنشا حالىقارالىق ۇيىمنىڭ ۇيلەستىرۋشىسى:

- وزبەكستان ءۇشىن سىرتقى كوشى- قون ماڭىزدى ءرول اتقارادى. وزگە ەلدە ەڭبەك ەتىپ جۇرگەندەر ەكونوميكاعا قوماقتى ينۆەستيتسيا قۇيىپ جاتىر. 2021 -جىلى ميگراناتتاردىڭ سىرتتان اكەلگەن قارجىسى 8 ميلليارد دوللاردان اسسا، بىلتىر دا وسى شاماعا جەتتى. ونىڭ كوبى رەسەي، كورەيا، قازاقستان سىندى ەلدەردەن اۋدارىلىپ جاتىر.

بۇل جاعداي وزبەكستان ورتالىق بانكىنىڭ تولەم جۇيەسىندەگى تەڭسىزدىكتى جويىپ كەلەدى. بۇعان قازاقستاننىڭ دا وڭ ىقپالى بار. بىلتىرعى 11 ايدا ەلىمىزدەگى جەكە تۇلعالار وزبەكستانعا 276 ميلليارد تەڭگە اۋدارعان. تۇركياعا دا وسىنشا شامادا قارجى جونەلتىلدى. رەسەي، قىرعىزستان جانە گرۋزيا بۇل تىزىمدە تومەنگى ساتىعا جايعاستى.

جالپى قازاقستاندا حالىقارالىق اۋدارىمداردىڭ ارتۋىنا الەمدەگى گەوساياسي جاعداي دا سەبەپ. ماسەلەن، رەسەيدە visa, mastercard سىندى تولەم جۇيەلەرى بۇعاتتالعان. ونداعى كەي ازاماتتار ەلىمىزدەگى بانكتەردە شوت اشىپ، حالىقارالىق اۋدارىم جاساۋدى ءجون كورەدى. ال وزبەكستانمەن الىس- بەرىس بۇرىننان بار. كەيىنگى كەزدە وتاندىق كاسىپكەرلەر كورشى ەل نارىعىنا كوپتەپ قارجى قۇيۋعا كىرىستى. تاشكەنت جانە ناۋايدە باستالعان تىڭ جوبالار قۇرىلىسى كەلەشەكتە ەكى ەلدىڭ بايلانىسىن ودان ءارى نىعايتادى.

اۆتورى: راۋان مىڭبايەۆ

https://khabar.kz/kk