اۋىلدىڭ ايتقىشتارى

استانا. قازاقپارات - تالاس اۋدانى، ويىق اۋىلىندا ساکەن سەيتىمبەت دەگەن ازىلکەش کىسى تۇرادى. قاراپايىم اۋىل ەڭبەککەرى ساکەڭنىڭ ءساتتى ازىلدەرى تىڭداعان ەلدىڭ کوڭىلىن ءدوپ باسادى ەکەن.

پۇل گاپيرادى

قىزىلقۇمداعى تاۋەلىباي ەلىندە ەربەکەت دەگەن کىسى بولىپتى، ءوزى قۋ ءتىلدى ەکەن. بىردە ەرەکەڭ بۇحارا قالاسىنا بارىپتى. دىتتەگەن جەرىنە تەزىرەک جەتۋ ءۇشىن تاکسي ۇستاپتى. جۇرگىزۋشى وزبەک ەکەن. جولدا تاکسيست ەرەکەڭنەن ونى-مۇنى سۇراسا کەرەک. ەرەکەڭنىڭ وزبەکشەسى قايبىر وڭىپ تۇر دەيسىڭ. کوبىنە سوزىنە قازاقشا قوسىپ سويلەپتى. تاکسيست ەرەکەڭنىڭ وزبەک ءتىلىن بىلمەيتىنىن بەتىنە باسپاق ويمەن: «اکا، وزبەکشەڭىز مىناۋ. ءوزىڭىز ۇلکەن باستىققا بارا جاتقان کورىنەسىز. سوندا باستىقپەن قالاي سويلەسەسىز؟» - دەپتى کەکەسىن ۇنمەن. سوندا ەرەکەڭ تاکسيسکە اقشا ۇسىنىپ: «ساسپا، اعايىن. باستىقپەن سويلەسىپ نەعىلايىن. مۇندايدا پۇل گاپيرادى ەمەس پە؟» دەگەندە تاکسيست: «البەتتە، دۇرىس ايتاسىز. پاي-پاي، وزبەکشە بىلەدى ەکەنسىز عوي»، - دەپتى اقشانى قوينىنا سۇڭگىتىپ جاتىپ.

تولەش تورەباي ۇلى،

قاراعاندى قالاسى.

«قولىنا نان ۇستاتا سالايىق...»

ساکەن کەڭشاردا ەگىنشى دە بولعان ەکەن. ءبيداي، ارپانى سۋارادى. سۋعارۋ کەزىن­دە ەگىنشىلەردە تىنىم جوق. ارىقتىڭ ار جەرىنەن سۋ کەتسە، بايلاۋ بەرمەي دىڭکەلەتەدى. کەزەکتى ءبىر ەگىن سۋارۋ کەزىندە سۋ ارىقتان اسىپ، بۇکىل سۋشى شارشاپ-شالدىعادى. سودان ءبىر جەرگە بايلاۋدىڭ ورنىنا ابيىر دەگەن کىسىنىڭ 11-12 جاسار قاينار دەگەن بالاسى جاتا کەتىپ سۋدى بوگەپ، قالعاندارى بايلاۋدى مىقتاپ بەکىتەدى. سوندا ساکەن:

- دۇرىس بولدى، سۋ توقتادى عوي. قاينار جاتا بەرسىن، قولىنا جارتى تابا نان ۇستاتا سالايىق، - دەگەن ەکەن.

ەسەت دوسالى،

تالاس اۋدانى، جامبىل وبلىسى.

«شارشاسام دا بىر ک ورەيىن...»

ساکەڭنىڭ بىردە جاقىن جيەنى ۇيلەنەدى. ول کەشکە دەيىن جۇمىس ىستەپ، قىزۋلاۋ کۇيدە سول قۋانىشتان ءبىر-اق شىعادى. جاس تۇسکەن کەلىنگە ىلەسىپ، ءبىر قۇربى قىزى کەلگەن ەکەن. اۋىلدىڭ جىگىتتەرى سول سۇلۋدى ورتاعا الىپ، بيلەپ، ەسىن شىعارىپتى. ساکەن دە قۇداشاسىن بيگە قولقالاپ، بەلىن جازدىرماپتى. ونى بايقاعان اپکەسى (کەلىننىڭ ەنەسى):

- اي، ساکەن شارشادىڭ، قوي ەندى، - دەسە کەرەک.

- اپکە، شارشاسام دا ءبىر کورەيىن، - دەيتىن کورىنەدى سوندا ساکەن ءبىر اۋىر جۇمىسقا تاۋەکەل ەتکەندەي.

«جەز و ک شە بولىپ...»

ساکەننىڭ ەتىکشىلىک ونەرى دە بار. ءبىر جولى ءبىر قۇرداسىنىڭ ايەلى وعان ەتىگىنىڭ وکشەسىن جوندەتۋگە بارادى. اۋىلدا قۇرداستار ءبىرىنىڭ ايەلىن ءبىرى «کەمپىرىم» دەپ ايتا بەرەدى. سوندا ساکەن «جەنسکيي» ەتىکتى ءارى-بەرى قاراپ تۇرىپ:

- اي، کەمپىرىم-اي، ەتىگىڭنىڭ وکشەسى وڭباي قۇرىپتى. مەن ونى جەزبەن جاماپ بەرەيىن.

ءجۇر سونان کەيىن جەز وکشە بولىپ، - دەپتى.

وقىرمان حاتتارىن ەکشەگەن - ءساليما ىسقاقوۆا

دەرەككوزى: «جاس الاش» گازەتى