ناۋرىز ايىندا كۇرىش پەن كۇنباعىس ءوندىرىسىن فورۆاردتىق قارجىلاندىرۋ باستالادى
«2023-جىلدان باستاپ الەۋمەتتىك ماڭىزى بار تاماق ونىمدەرىن جەتكىزۋگە فورۆاردتىق قارجىلاندىرۋدىڭ جاڭا ءتاسىلى 3 كەزەڭدە ەنگىزىلەدى. ءبىرىنشى كەزەڭ كۇزگى جانە ەرتە پىسەتىن كوكونىستەردى فورۆاردتىق ساتىپ الۋدى جانە كەيىن وسى الىنعان كوكونىستى ماۋسىمارالىق كەزەڭدە نارىققا جەتكىزۋدى قامتيدى. بۇل كوكونىس باعاسىنىڭ ەڭ جوعارى ءوسىمى قىستىڭ اياعىندا جانە كوكتەمدە بولۋىنا بايلانىستى»، - دەدى ول ۆەدومستۆونىڭ كەڭەيتىلگەن القا ماجىلىسىندە.
ءمينيستردىڭ سوزىنە قاراعاندا، بۇدان بىلاي ەگىن جۇمىستارىن ۋاقتىلى جۇرگىزۋ ءۇشىن كوكونىس ءوندىرىسى ءبىر جىل بۇرىن قارجىلاندىرىلادى.
«ياعني، كەلەسى جىلدىڭ ەرتە پىسەتىن كوكونىس ءونىمىن الۋ ءۇشىن قارجى جىلىنىڭ 1- تامىزىنا دەيىن، ال كەلەسى جىلدىڭ كۇزىندە پىسەتىن كوكونىس ءونىمىن الۋ ءۇشىن 1- قىركۇيەككە دەيىن قارجىلاندىرىلادى»، - دەپ ءتۇسىندىردى مينيستر.
اتالعان ءتاسىلدىڭ ەكىنشى كەزەڭىندە شيكىزات ساتىپ الۋ ءۇشىن وڭدەۋشى كاسىپورىندارىنىڭ اينالىم قاراجاتىن قارجىلاندىرۋ كوزدەلگەن.
«بۇگىنگى تاڭدا ساۋدا جانە ينتەگراتسيا مينيسترىلىگى وڭىرلەر مەن قانت زاۋىتتارى اراسىنداعى مەموراندۋم اياسىندا قانت زاۋىتتارىنىڭ اينالىم قاراجاتىن قارجىلاندىرىپ جاتىر. سونداي-اق، قاراقۇمىق، كۇرىش جانە كۇنباعىس وندىرۋشىلەرىن وڭدەۋشى كاسىپورىندار ارقىلى فورۆاردتىق قارجىلاندىرۋ ماسەلەسى پىسىقتالىپ جاتىر. ونى ەنگىزۋ 2023-جىلعى ناۋرىزعا جوسپارلانىپ وتىر. ءۇشىنشى كەزەڭ ارزانداتىلعان استىقتى مەملەكەتتىك قولداۋ جانە وتكىزۋ تەتىكتەرى ارقىلى قارجىلاندىرۋعا باعىتتالادى. ونى ەنگىزۋ 2023-جىلدىڭ ماۋسىم ايىنا جوسپارلانعان»، - دەدى ەربول قاراشوكەيەۆ.
