جەتىسۋ وبلىسىندا ءشيبورى اۋلاۋ شاراسى ۇيىمداستىرىلدى

None
استانا.قازاقپارات - جەتىسۋ وبلىسىنىڭ ەسكەلدى اۋدانىندا بيىلعى قىس مەزگىلىندە شي- بورىلەردىڭ تىم كوبەيىپ كەتكەنى بايقالىپ وتىر.

ولاردىڭ اۋىلعا كىرۋ وقيعاسى جيىلەگەندىكتەن، تۇرعىندار ءۇي جانۋارلارى مەن ويىن بالالارىنا الاڭداي باستاعان. ويتكەنى بۇل جىرتقىش اڭ تۇرىنەن ءتورت تولىك مالعا اۋرۋ جۇعۋى مۇمكىن. اشىققاندا ادامدارعا دا شابۋىلدايتىنى بار. سول سەبەپتى جەرگىلىكتى ساياتشىلار ولاردىڭ سانىن رەتتەۋ ءۇشىن دەمالىس كۇندەرى اتقا ءمىنىپ، تازىمەن ءشيبورى اۋلاۋ شاراسىن ۇيىمداستىردى. ءشيبورى - قاسقىر سياقتى سانى قولمەن رەتتەۋگە جاتاتىن جىرتقىش اڭ ءتۇرى. جەتىسۋ جەرىندە ولاردىڭ سانى بيىل ەرەكشە كوپ بولىپ تۇر. ءشيبورىنىڭ اۋىلداعى ۇيلەردى ماڭايلاپ، ەلدى مەكەندەرگە كىرۋ وقيعاسى جيىلەپ كەتكەندىكتەن، ەسكەلدى اۋدانىنىڭ اڭشىلارى بۇعان دەيىن دە ءبىر رەت وسىنداي شارا ۇيىمداستىرعان. ول كەزدە ءشيبورىنىڭ 10 شاقتىسى كوزگە تۇسسە، بۇل جولى كوپ كورىنبەدى. سوعان قاراعاندا ءشيبورى اۋلاۋ ناۋقانى ءوز جەمىسىن بەرە باستاعان سياقتى.

ارنات التىنبەكوۆ، ساياتشى:

- شيبورىلەر قاپتاپ كەتتى. مىنە، وسىلاي جينالىپ، كىشكەنە بولسىن، اۋىلدان بالالار مەكتەپكە جۇرەدى، تاڭەرتەڭ ەرتە جۇرەدى، كەشكە جۇرەدى. جاڭاعىداي بالالارعا، ايەل كىسىلەرگە تيمەسە، ۇلكەن كىسىلەرگە تيىسپەيدى. ەستىپ جاتامىز، جۇگىرىپ، شاۋىپ جاتادى ەكەن.

ەلدوس احمەتوۆ، ەسكەلدى اۋدانىنىڭ اكىمى:

- سالبۋرىن دەيمىز، قانسونار دەيمىز. مىلتىق اتىپ، نە ونەر ەمەس. ءيتتىڭ وسىسى - ونەر. جىگىتتەر ءبىر- بىرىمەن جاقىن تانىسىپ، قانشاما يتتەر الىپ شىعىپ، ەكىنشى جاعىنان مىنا ءشيبورى كوبەيىپ بارا جاتىر. سونى كىشكەنە ازايتىپ، مىنا اۋىلدىڭ ماڭىنان ۇستايتىنىن ۇستاپ، ءبىراز جوعارى قاراي قۋالاپ جىبەرەيىك دەگەنبىز.

مىنا ەلدەرگە، جاقىن جەردەگى اۋىلدارعا مازا بەرمەي جاتىر. ەسكەلدى اۋدانىنىڭ جەرگىلىكتى ازاماتتارى جاراۋ ات ءمىنىپ، جۇيرىك تازى جۇگىرتىپ، جەردەگى بولىپ جاتقان جاعدايدى ارنايى تەحنيكالاردىڭ كومەگىمەن اۋەدەن دە باقىلاپ كوردى. قۇماي تازى الدىنان شىققان اڭنىڭ ءبارىن الۋعا تىرىسادى. سول سەبەپتى اۋىل ىرگەسىندەگى توعايدا جايىلىپ جۇرگەن توپ ەلىكتى قۋىپ كەتكەنىن دە كوزىمىز شالىپ قالدى.

داۋرەن بايكەرىم، ساياتشى:

- ساياتشىلىق دەگەن اتا- بابامىزدان قالعان مۇرا عوي. سونى قولعا الىپ، وسى تازىلارىمىزدى دامىتۋ ماقساتىندا، تازىلارىمىز قالىپ كەتپەسىنشى، اللا قالاپ، بالالارىمىزعا بىزدەن مۇراعا قالاتىنداي قىلىپ، سونداي ماقساتتا جاقسى- جاقسى جۇيرىك تازىلار قالسىنشى دەگەن نيەتتە وسى تازىنى اسىلداندىرىپ جاتىرمىز.

ارنات التىنبەكوۆ، ساياتشى:

- 5-6 -جىل كولەمى بولدى، وسى تازىلاردى اسىلداندىرىپ جاتىرمىز. قايتادان ەسكى قانداردى الىپ، جان- جاقتان قوسىپ جاتىرمىز. قازاقستاننىڭ تۇكپىر- تۇكپىرىنەن الامىز. ءوزىمىز دە جان- جاققا، قازاقستان بويىنشا جاقسى- جاقسى تۇقىمداردى جىبەرىپ وتىرامىز. ءوزىمىز كوبىنەسە ەتىسۋدىڭ كوكقاسقاسى سياقتى تازىلاردى ۇستايمىز. ءشيبورى دە قاسقىر- تۇلكى سياقتى وتە ساق جۇرەتىن جىرتقىش. بۇگىنگىدەي شارادان سوڭ ەندى ولار ءبىراز ۋاقىتقا دەيىن اۋىلعا جولامايدى. «ءبىزدىڭ ماقساتىمىز - شيبورىگە جاۋداي ءتيىپ، قىناداي قىرىپ تاستاۋ ەمەس. ۇركىتىپ، اۋىلداستارىمىز بەن ءۇي جانۋارلارىنىڭ قاۋىپسىزدىگىن قامتاماسىز ەتۋ. ەكىنشىدەن، ۇرپاقتان ۇرپاققا جالعاسقان ساياتشىلىق ونەرىن دامىتۋ بولدى»، - دەيدى شارانى ۇيىمداستىرۋشىلار.

www.24.kz


سوڭعى جاڭالىقتار