مامىردا قازاقستان اۋسىلدان تازا ەل دەپ تانىلۋى مۇمكىن

None
استانا. قازاقپارات - بيىل قازاقستاننىڭ بۇكىل وڭىرلەرىندە اۋسىلعا قارسى ەكپە جۇمىستارى جۇرگىزىلەدى. سول ءۇشىن رەسپۋبليكالىق بيۋدجەتتەن 3,5 ميلليارد تەڭگە قاراستىرىلعان، دەپ حابارلايدى قازاقپارات ءتىلشىسى.

بۇل جايىندا ۆەتەريناريالىق باقىلاۋ جانە قاداعالاۋ كوميتەتىنىڭ ءتوراعاسى اسقار جاقىپبايەۆ ۆەدومستۆونىڭ كەڭەيتىلگەن القا ماجىلىسىنەن كەيىن باق وكىلدەرىنىڭ ساۋالىنا بەرگەن جاۋابىندا ايتتى.

«اۋسىل بويىنشا ايتساق، بىلتىر 14- قاڭتاردا قاراعاندى وبلىسىندا اۋسىلدان قولايسىز وشاق اشىلعان. 8- اقپاندا جۇمىستاردىڭ ءبارى تولىق اياقتالىپ، باتىس، سولتۇستىك، ورتالىق وڭىرلەردە اۋسىلعان قارسى ەكپە جۇمىستارى ءجۇردى. ۆاكسينالاۋعا بىلتىر كونكۋرس وتكىزگەنبىز. 1 ميلليارد 600 ميلليون تەڭگە ۇنەمدەلگەن. وسى اقشاعا اۋسىلعا قارسى ەكپە الىندى. رەسەي فەدەراتسياسىنىڭ ۆلاديمير قالاسىندا وندىرىلگەن ۆاكسينانى ساتىپ العانبىز. حالىقارالىق بيۋروعا مالىمەتتەر بەرىلدى. قازىر سول جاقتان كوميسسيا توسىپ وتىرمىز. ناۋرىز، ءساۋىر ايلارىندا كەلەدى. مامىردا وتەتىن 90-سەسسياسىندا «قازاقستان اۋسىلدان تازا، ۆاكسينا قولدانۋ كەرەك» دەگەن شەشىم قابىلدانادى»، - دەدى ول.

كوميتەت باسشىسى اۋسىلعا قارسى ەكپەنىڭ شىعىنى رەسپۋبليكالىق بيۋدجەتتەن بولىنگەندىكتەن، قاراپايىم مال يەلەرى ءۇشىن بۇل تەگىن بولاتىنىن ەسكەرتتى.

«بيىل بۇكىل رەسپۋبليكا بويىنشا ۆاكسينا ەگىلەدى. سول ءۇشىن ۆاكسينا ساتىپ الۋ تۋرالى كونكۋرس جاريالادىق. وعان 3,5 ميلليارد تەڭگە قاراستىرىلعان.

حالىقالىق ەپيزوتيكالىق بيۋرونىڭ اسا قاۋىپتى اۋرۋلار تىزبەسىندە 88 اۋرۋ ەنگەن. ونىڭ 45- ءى بەلگىلى ءبىر كەزدەرى قازاقستان اۋماعىندا تىركەلگەن. ءبىراق سونىڭ تەك 23-ىنە عانا رەسپۋبليكالىق بيۋدجەتتەن ۆاكسينا ساتىپ الامىز. اۋسىل سونىڭ ىشىندە. مەملەكەت ءوزى ساتىپ الاتىن ۆاكسينالار حالىق ءۇشىن تەگىن. مۇنى حالىق تا، شارۋا قوجالىقتارى جاقسى بىلەدى»، - دەدى اسقار جاقىپبايەۆ.

اۆتور

ەسىمجان ناقتىباي

سوڭعى جاڭالىقتار