ءورت ءسوندىرۋشى قىزمەتىنىڭ ەل بىلمەيتىن قىرلارى

وسكەمەن. قازاقپارات - كۇن سايىن قىزىل جالىنمەن كۇرەسكە تۇسەتىن ءورت سوندىرۋشىلەردىڭ جۇمىسى اۋىر ەكەنىن بىلسەك تە، ونىڭ كوپ تۇستارىنان بەيحابارمىز.

وسى رەتتە، ش ق و توتەنشە جاعدايلار دەپارتامەنتىنىڭ قىزمەتكەرلەرى جۇمىس بارىسىنىڭ كەيبىر ساتتەرىن تانىستىرىپ ءوتتى، دەپ حابارلايدى قازاقپارات ءتىلشىسى.

ءورت سوندىرۋشىلەر جۇمىسى ەڭ قاۋىپتى جۇمىستاردىڭ تىزىمىندە تۇر. نەگىزىنەن قۇتقارۋشىلار اۋىسىممەن جۇمىس ىستەيدى. ال ەگەر قانداي دا ءبىر توتەنشە جاعداي بولسا، وندا ەش ءۇزىلىسسىز تەر توگۋگە دايىن.

«ءورت ءسوندىرۋشىنىڭ كيىمىن جاساۋ ءۇشىن 150 گرادۋسقا دەيىنگى تەمپەراتۋراعا توتەپ بەرە الاتىن ارنايى ماتا قولدانىلادى. سونىمەن قاتار، ول كونسەنتراتسيالانعان قىشقىلدار مەن سىلتىنىڭ اسەرىنەن قورعايدى. وسىنىڭ ارقاسىندا ءورت سوندىرۋشىلەر ادامداردى جانىپ جاتقان ۇيلەردەن الىپ شىعا الادى»، - دەپ حابارلادى وبلىستىق ت ج د باسپا ءسوز قىزمەتى.

جۇمىس قاۋىپتى ءارى وتە اۋىر. ويتكەنى، كۇندەلىكتى كيەتىن كيىم سالماعى 30 كەلىگە جەتەدى. مۇنىڭ ءبارى كيىمنىڭ نەدەن جاسالعانىنا جانە وزىمەن الىپ جۇرگەن جابدىقتارعا بايلانىستى. وسىنداي جاعدايلاردى ەسكەرە وتىرىپ، ءورت ءسوندىرۋشىنىڭ جۇمىسىنا تەك فيزيكالىق تۇرعىدا جاقسى دايىندالعان ازاماتتار عانا جارايتىنى تۇسىنىكتى.

«ءورت تۋرالى حابار كەلگەندە، بولىمشە قىزمەتكەرلەرىنە فورمانى كيىپ، وقيعا ورنىنا بارۋ ءۇشىن جينالۋعا نەبارى 60 سەكۋند بار. سول ءۇشىن ارنايى كيىمدەردى ەرەكشە ادىسپەن دايىنداپ قويۋ شارت. مىسالى، ورتتە كيەتىن كۇرتە الدىن الا تەرىس اۋدارىلىپ، سونداي-اق شلەم، شالبار، ءورت بەلدىگى بەلگىلى ءبىر تارتىپپەن ورنالاسادى»، - دەلىنگەن اقپاراتتا.

كولىكتە 5 تونناداي سۋدى ساقتايتىن تسيستەرنا بولادى. ءار ماشينادا سۋدى تەز تولتىرۋعا ارنالعان سورعى بار.

«ءورت سوندىرۋشىلەردىڭ جۇمىسى تۋرالى فيلمدەردە ولاردىڭ جانىپ جاتقان عيماراتتا قالاي وڭاي قوزعالاتىنى جانە زارداپ شەككەندەردى نەمەسە شىعۋ ورنىن تەز تاباتىنى كورسەتىلەدى. ءبىراق، شىنايى ومىردە ءبارى كەرىسىنشە. ءتۇتىن سالدارىنان جانىپ جاتقان ۇيدە ەشتەڭە كورىنبەيدى. ال لاۋلاپ جاتقان وت دىبىسىنان ەشتەڭە دە، ءتىپتى ادامداردىڭ ايعايى دا ەستىلمەيدى. دەسە دە، مۇنداي جاعدايدا ماسكانى شەشىپ تاستاۋعا بولمايدى. ايتپەسە، ءورت ءسوندىرۋشى تۇنشىعىپ قالۋى مۇمكىن. سوندىقتان، قۇتقارۋشىلار جانىپ جاتقان بولمەلەردە كولمەن قابىرعانى سيپاپ ءجۇرىپ قوزعالادى»، - دەيدى باسپا ءسوز قىزمەتىنىڭ ماماندارى.