ىستانبۇلدا جوعارى جىلدامدىقتى مەترو جەلىسى ىسكە قوسىلدى

None
ىستامبۇل. قازاقپارات - كياگىتحانە- ىستانبۇل اۋەجايىنداعى مەترو جەلىسى جوباسىمەن تۇركيا بۇكىل الەمگە مەترو قۇرىلىسى سالاسىنداعى ءوزىنىڭ كۇشى مەن مۇمكىندىكتەرىن دالەلدەدى.

بۇل تۋرالى تۇركيا پرەزيدەنتى رەجەپ تايىپ ەردوعان 34 شاقىرىمدىق مەترو جەلىسىنىڭ اشىلۋ سالتاناتىندا ايتتى، دەپ حابارلايدى قازاقپارات انادولى اگەنتتىگىنە سىلتەمە جاساپ.

تۇركيا پرەزيدەنتى سەگىز ستانسيانى قامتيتىن جاڭا مەترو جەلىسىنىڭ قياگىتحانە اۋدانىنان ىستانبۇل اۋەجايىنا دەيىنگى قاشىقتىقتى 24 مينۋتتا وتەتىنىن اتاپ ءوتتى.

«تاۋلىگىنە 800 مىڭ جولاۋشىنى تاسىمالدايتىن جاڭا مەترو جەلىسىنىڭ اشىلۋى ىستامبۇل ءۇشىن تاريحي وقيعا»، - دەدى ەردوعان.

تۇركيا باسشىسى قۇرىلىس بارىسىندا وتاندىق ماتەريالداردى پايدالانعان تۇرىك ينجەنەرلەرىنىڭ ەڭبەگىن ەرەكشە اتاپ ءوتتى.

ەل پرەزيدەنتى سونداي-اق، ىستانبۇل اۋەجايىنان حالكالى ايماعىنا دەيىنگى مەترو جەلىلەرىنىڭ، سونداي-اق مەگاپوليستە بىرنەشە باسقا مەترو جەلىلەرىنىڭ قۇرىلىسى جالعاسىپ جاتقانىن ەسكە سالدى.

«وسى جوبالاردىڭ بارلىعىن جۇزەگە اسىرۋ اياقتالعاندا ىستانبۇل تەمىرجول جۇيەلەرىنىڭ جالپى ۇزىندىعى 380 شاقىرىمنان اسادى»، - دەدى ەردوعان.

ىستانبۇل تەمىرجول قۇرىلىسى جوبالارىن جۇزەگە اسىرۋ بويىنشا الەم قالالارى ىشىندە ءبىرىنشى ورىندا. قياگىتحانە- ىستامبۇل اۋەجايى مەترو جەلىسىندە ساياحات ءبىر اي بويى تەگىن.


سوڭعى جاڭالىقتار