تۇرعىندار قازاق، اعىلشىن، ورىس تىلدەرىن تەگىن ۇيرەنەدى

«ءتىل» وقۋ- ادىستەمەلىك ورتالىعى باسشىسىنىڭ مىندەتىن اتقارۋشى لاۋرا عازيزوۆانىڭ مالىمەتىنشە، اتىراۋ قالاسىندا قازاق، ورىس، اعىلشىن تىلدەرىن تەگىن وقىتاتىن كۋرس اشىلعان. ءتىل ۇيرەتۋ كۋرستارىنا وقۋعا 20 جاستان اسقان كەز كەلگەن تۇرعىن تىركەلە الادى.

ارنايى كۋرستا ەركىن سويلەۋگە دەيىنگى ءتىل جەتىلدىرۋ ماشىعى وقىتىلادى. بۇل جوبانى وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن «ءتىل» وقۋ- ادىستەمەلىك ورتالىعى جۇزەگە اسىرۋدى قولعا العان.

«ءبىز قازاقستاننىڭ دامىعان جانە الدىڭعى قاتارلى وركەنيەتتى ەلدەر قاتارىندا بولعانىن قالايمىز. بۇل ءۇشىن ەل ازاماتتارىنىڭ بىلىمگە، اسىرەسە شەت تىلدەردى مەڭگەرۋگە تالپىنىسى بولۋى كەرەك. ويتكەنى، قازىر جاڭا زاماننىڭ سىن- تەگەۋرىندەرىنە تەز بەيىمدەلۋ قاجەتتىگى تۋىنداپ وتىر. وسى تۇرعىدان ايتقاندا، ءتىل ۇيرەتۋ كۋرسىن اشۋداعى ماقساتىمىز - اتىراۋ تۇرعىندارىنىڭ بىلىكتىلىگىن ارتتىرۋ، باسەكەگە قابىلەتتى بولۋىنا جاعداي جاساۋ. قازىر ءبىزدىڭ ورتالىقتاعى ءتىل ۇيرەتۋ كۋرسىندا 70-كە جۋىق ادام وقىپ جاتىر. ولاردىڭ 80 پايىزى - جەكە ادامدار، ال 20 پايىزى - مەكەمەلەردە جۇمىس ىستەيتىن قىزمەتكەرلەر. ءتىل ۇيرەنگىسى كەلەتىندەر ءبىر توپقا 15 ادامنان بولىنەدى. وقۋ جيىلىگى اپتاسىنا بەس رەت دەپ بەكىتىلگەن. قازاق ءتىلى كۋرسى 120 ساعات وقىتىلادى. ال، ورىس ءتىلى مەن اعىلشىن ءتىلىن وقىتۋعا 80 ساعات ءبولىنىپ وتىر»، - دەپ حابارلادى جوبانىڭ ۇيىمداستىرۋشىسى لاۋرا عازيزوۆا.

ەسكە سالا كەتەلىك، بۇعان دەيىن وڭىرگە ءىس-ساپارمەن كەلگەن ەرلان قوشانوۆتىڭ ەل ازاماتتارىنىڭ قۇقىقتىق، قارجىلىق ساۋاتى ءالى دە تومەندىگىن ايتقانىن حابارلاعان ەدىك.