تۇركىستان وبلىسىندا ەلىمىزدەگى ەڭ ۇلكەن جىلىجاي كەشەنى سالىنادى
بۇگىن تۇركىستان وبلىسىنىڭ اكىمى دارحان ساتىبالدى ينۆەستورلارمەن كەزدەسىپ، ماڭىزدى جوبانى تالقىلادى. اۋقىمدى قۇرىلىس جۇمىستارى جوسپار بويىنشا ناۋرىز ايىندا باستالىپ، ءبىر جىلدان سوڭ ىسكە قوسىلادى. وبلىس اكىمى اتالعان جوبانىڭ ماڭىزدىلىعىن اتاپ ءوتتى. جىلىجاي مەگا- كەشەنىنىڭ جوباسى «ەكو- كۋلتۋرا» اگروونەركاسىپتىك حولدينگىنىڭ قازاقستاندىق سەرىكتەسى «Green Land Alatau» كومپانياسىنىڭ كومەگى ارقىلى جۇزەگە اسادى.
جوبا اياسىندا ينفراقۇرىلىم جۇرگىزۋ جۇمىستارى ءجۇرىپ جاتىر. كەلەس اۋدانىندا جۇزەگە اساتىن ينۆەستيتسيالىق جوبا اياسىندا مىڭعا جۋىق جۇمىس ورنىن قۇرىلادى. سونىمەن قاتار ينۆەستورلار اگروسالا ماماندارىن دايىندايتىن رەسەيلىك جوعارى وقۋ ورىندارىمەن بىرلەسىپ، اۋىل شارۋاشىلىعى سالاسىنداعى بىلىكتى مامانداردى دايىنداۋدى قولعا الماق.
«ەكو- كۋلتۋرا» اگروونەركاسىپتىك حولدينگى قىزمەتىنىڭ نەگىزگى ءتۇرى - وندىرىستىك تسيكلى جىل بويى جالعاساتىن جابىق توپىراقتا كوكونىس ءوسىرۋ. حولدينگتىڭ قۇرامىنا رەسەيدىڭ بىرنەشە وبلىسىنداعى جۇمىس ىستەپ تۇرعان جىلىجاي كەشەندەرى كىرەدى. ينۆەستيتسيالىق جوبانى جۇزەگە اسىرۋ ءۇشىن كليماتتىق جاعدايى قولايلى سانالاتىن وڭتۇستىك ءوڭىرى ارنايى تاڭدالعان.
«بۇل وڭىرىمىزدە جۇزەگە اساتىن ماڭىزدى جوبالاردىڭ ءبىرى بولماق. اۋىل شارۋاشىلىعى سالاسىندا مامانداردىڭ بىلىكتىلىگىن ارتتىرۋ دا وتە ماڭىزدى ماسەلە. جوبا اياسىندا جەرلەستەرىمىز ءۇشىن جۇمىس ورىندارى اشىلادى. وعان ءبىز قۋانامىز. اۋىل شارۋاشىلىعى ونىمدەرىنە سۇرانىس ءارقاشان جوعارى. اگروونەركاسىپتىك كەشەندى ودان ءارى دامۋ الەۋەتى زور ماڭىزدى سالا. وسىنداي ءىرى جوبانى جۇزەگە اسىرۋ ءبىز ءۇشىن ماڭىزدى»، - دەدى تۇركىستان وبلىسىنىڭ اكىمى دارحان ساتىبالدى.
كەزدەسۋ قورىتىندىسى بويىنشا تاراپتار ينجەنەرلىك ينفراقۇرىلىمدى جۇرگىزۋ، ينۆەستيتسيالىق سۋبسيديالار جانە جوبانى قارجىلاندىرۋعا قاتىستى ماسەلەلەردى مۇقيات پىسىقتاۋعا كەلىستى. زاماناۋي جىلىجاي كەشەندەرى ءوسىپ جاتقان داقىلداردىڭ تولىق تسيكلىن باقىلايتىن، جىلىتۋ جۇيەسى مەن سالقىنداتۋدى، جارىق رەجيمىن، تامشىلاتىپ سۋارۋدى، اتموسفەراداعى كومىرقىشقىل گازىنىڭ مولشەرىن باسقاراتىن زاماناۋي اۆتوماتتاندىرىلعان كليماتتىق باقىلاۋ جۇيەسىمەن جابدىقتالاتىن بولادى.
اۆتور
قايرات زاينيشيەۆ
