نۇرسۇلتان نازاربايەۆ ەمدەلىپ جاتقان ورتالىق قىزمەتكەرلەرىنە پالاۋ تاراتىلعانى راس پا

None
استانا. قازاقپارات – ق ر تۇڭعىش پرەزيدەنتى نۇرسۇلتان نازاربايەۆ ەمدەلىپ جاتقان ۇلتتىق عىلىمي كارديوحيرۋرگيا ورتالىعى قىزمەتكەرلەرىنە وسى پاتسيەنتتىڭ اتىنان پالاۋ تاراتىلدى ما؟

الەۋمەتتىك جەلىلەردە تارالعان اقپاراتتارعا بايلانىستى ب ا ق وكىلدەرى ورتالىق ديرەكتورىنا وسىنداي ساۋال قويدى، دەپ حابارلايدى قازاقپارات ءتىلشىسى.

ۇلتتىق عىلىمي كارديوحيرۋرگيا ورتالىعىنىڭ حيرۋرگيا بويىنشا ديرەكتورى يۋري پياعا بريفينگ بارىسىندا نۇرسۇلتان نازاربايەۆقا جاسالعان ەمدەۋ پروتسەدۋراسى مەن دەنساۋلىعىنان باسقا دا ساۋالدار قويىلدى. اتاپ ايتقاندا، تىلشىلەر تۇڭعىش پرەزيدەنتتىڭ ەمدەۋ پروتسەدۋراسىنىڭ ءساتتى وتۋىنە بايلانىستى ۇلتتىق كارديوحيرۋرگيا ورتالىعىنىڭ قىزمەتكەرلەرىنە پالاۋ تاراتىلعاندىعىنىڭ راس-وتىرىگىن ناقتىلادى. بۇل تۋرالى اقپارات جەلىدە تاراعان ەدى.

«ول جاعىن بىلمەدىم. مەن پروتسەدۋرادان كەيىن اسحاناعا بارىپ تاماقتاندىم. ول (تۇڭعىش پرەزيدەنت - رەد.) ەم الىپ جاتقان جاعدايدا پالاۋعا تاپسىرىس بەردى دەپ ايتا الماس ەدىم»، - دەدى يۋري پيا.

ايتا كەتسەك، بۇگىن نۇرسۇلتان نازاربايەۆقا وتا جاسالعانى حابارلاندى.

بۇعان دەيىن كارديوحيرۋرگ نۇرسۇلتان نازاربايەۆتىڭ قازىرگى جاعدايى تۋرالى ايتىپ بەرگەن ەدى.

سونداي-اق، مامان تۇڭعىش پرەزيدەنت ەمىنىڭ اقىسىز ەكەندىگىن ءمالىم ەتتى.

سوڭعى جاڭالىقتار