مەكتەپ جاسىنداعى بالالارعا ارنالعان مادەني نورماتيۆ بەكىتىلمەك

None
استانا. قازاقپارات – ق ر پرەمەر-ءمينيسترىنىڭ ورىنباسارى التاي كولگىنوۆ جاۋاپتى ۆەدومستۆوعا مادەنيەت ساياساتىنىڭ جاڭا تۇجىرىمداماسىن بەكىتۋگە قاتىستى تاپسىرما بەردى، دەپ حابارلايدى قازاقپارات ءتىلشىسى.

«مادەنيەت مينيسترلىگىنىڭ الدىندا ءبىرقاتار ماڭىزدى مىندەت تۇر. بىرىنشىدەن، مادەنيەت ساياساتىنىڭ جاڭا تۇجىرىمداماسىن بەكىتۋدى جەدەلدەتۋىمىز قاجەت. بۇل قۇجات رۋحانيات جانە ونەر سالالارىنداعى ماسەلەلەردىڭ جۇيەلى تۇرعىدا شەشىلۋىنە جول اشىپ، وتاندىق كينوعا، تەاترلارعا، مادەنيەت وشاقتارىنا حالىقتىڭ ىقىلاسىن ودان ءارى ارتتىرۋى ءتيىس. تەاترعا، مۋزەيگە، كىتاپحاناعا، كورمەگە جانە باسقا دا مادەني ءىس-شاراعا تۇراقتى بارۋدى داستۇرگە اينالدىرۋ باستى مىندەتتىڭ ءبىرى. ول ءۇشىن مينيسترلىك اكىمدىكتەرمەن بىرگە ونەر وشاقتارىن، ونىڭ ىشىندە تەاترلاردى قولداۋ شارالارىنا ەرەكشە نازار اۋدارۋى ءتيىس»، - دەدى ا. كولگىنوۆ مادەنيەت مينيسترلىگىنىڭ القا ماجىلىسىندە.

ونىڭ ايتۋىنشا، قوعامدا كىتاپ وقۋدى دارىپتەۋگە زور كوڭىل ءبولۋ قاجەت. كىتاپحانالار قورىن كوپشىلىك اراسىندا سۇرانىسقا يە وتاندىق جانە شەتەلدىك جازۋشىلاردىڭ شىعارمالارىمەن تولىقتىرىلىپ وتىرى ماڭىزدى. سۇرانىسقا قاراي كىتاپحانا قورىن ەلەكتروندى فورماتقا كوشىرىلۋىن كەزەڭ-كەزەڭمەن قولعا الۋ كەرەك.

«تۇجىرىمداما اياسىندا مەكتەپ جاسىنداعى بالالارعا ارنالعان مادەني نورماتيۆ بەكىتىلىپ، وسكەلەڭ ۇرپاقتى رۋحاني قۇندىلىقتارمەن سۋسىنداتۋعا باسىمدىق بەرۋ جوسپارلانىپ وتىر. مۇنداي قادام بالالاردى جان-جاقتى دامىتۋعا، ولاردىڭ شىعارماشىلىق وي-ءورىسىن ىلگەرىلەتۋگە جول اشادى. بۇل ماڭىزدى باستامانى ىسكە اسىرۋ مەحانيزمدەرىن وقۋ-اعارتۋ مينيسترلىگىمەن، اكىمدىكتەرمەن بىرگە جان-جاقتى پىسىقتاۋدى تاپسىرامىن»، - دەدى ۇكىمەت باسشىسىنىڭ ورىنباسارى.

ونىڭ سوزىنە قاراعاندا، جالپى تۇجىرىمدامادا مادەنيەت سالاسىنىڭ دامۋىنا تىڭ سەرپىن بەرەتىن كەشەندى شارالار قاراستىرىلۋى ءتيىس.

«مينيسترلىك بەلگىلەنگەن تارتىپپەن قۇجات جوباسىنىڭ كەلىسۋ راسىمدەرىن اياقتاپ، ۇكىمەت وتىرىسىندا قابىلدانۋىن قامتاماسىز ەتۋى قاجەت»، - دەدى التاي كولگىنوۆ.

سوڭعى جاڭالىقتار