قازاقستاندا ماشينا جاساۋ سالاسىنداعى ەكسپورت قانشا پايىزعا ءوستى

استانا. قازاقپارات - پرەمەر-مينيستر ءاليحان سمايىلوۆ قازاقستان ماشينا جاساۋشىلار وداعىنىڭ باسقارما ءتوراعاسى مەيرام پىشەمبايەۆپەن كەزدەستى.

بۇل تۋرالى قازاقپارات ۇكىمەتتىڭ سايتىنا سىلتەمە جاساپ حابارلايدى.

ماشينا جاساۋشىلار وداعىنىڭ باسشىسى 2022-جىلدىڭ قورىتىندىسى جانە الداعى كەزەڭگە ارنالعان سالانىڭ دامۋى تۋرالى باياندادى.

اتاپ ايتقاندا، وتكەن جىلى ماشينا جاساۋ سالاسىنداعى ءوندىرىس كولەمى 3,1 تريلليون تەڭگەنى قۇرادى (ن ك ي ءوسىمى - 9,4 پايىز)، ال ونىڭ وڭدەۋ ونەركاسىبىندەگى ۇلەسى 15 پايىزعا جەتتى. وسى ورايدا سالا ءونىمىنىڭ ەكسپورتى 53 پايىزعا ءوسىپ، $2,3 ميلليارد بولدى.

كەزدەسۋ بارىسىندا وتاندىق كاسىپورىنداردى شيكىزاتپەن قامتاماسىز ەتۋ، قوسارلى ءبىلىم بەرۋدى قولداۋ، ينۆەستيتسيالار تارتۋ، تەحنولوگيالار ترانسفەرتى، جاڭا جوبالار قۇرۋ جانە ت. ب. بويىنشا ماشينا جاساۋ سالاسىن ودان ءارى دامىتۋدىڭ نەگىزگى ماسەلەلەرى تالقىلاندى.

مۇنداعى ءوندىرىستىڭ ءوسۋ قارقىنىن وڭ باعالاعان ءاليحان سمايىلوۆ مەملەكەت باسشىسىنىڭ تاپسىرمالارىن ورىنداۋ ماقساتىندا ماشينا جاساۋ سالاسىن دامىتۋدىڭ جاڭا كەشەندى جوسپارىندا بارلىق ءتۇيىندى ماسەلەلەر مەن نەگىزگى مىندەتتەر كورىنىس تاباتىنىن اتاپ ءوتتى.

ءوز كەزەگىندە مەيرام پىشەمبايەۆ ماشينا جاساۋشىلار وداعى ۇكىمەتپەن تىعىز بايلانىستا كەشەندى جوسپاردى ازىرلەۋگە ءوز ۇلەسىن قوسۋعا دايىن ەكەنىن ءبىلدىردى.