ريددەر حالقىنان كەشىرىم سۇرايمىن - دانيال احمەتوۆ

وسكەمەن. قازاقپارات - شىعىس قازاقستان وبلىسىنىڭ اكىمى دانيال احمەتوۆ ريددەر جىلۋ ەلەكتر ورتالىعىنداعى اقاۋلار مەن اپاتتاردان ۇيلەرى قايتا- قايتا سۋىپ كەتىپ وتىرعان تۇرعىنداردان كەشىرىم سۇرادى، دەپ حابارلايدى قازاقپارات ءتىلشىسى.

ش ق و اكىمدىگىنىڭ مالىمەتىنشە، ايماق باسشىسى دانيال احمەتوۆ ريددەر قالاسىنا بارىپ، جىلۋ ەلەكتر ورتالىعىنداعى احۋالمەن تانىستى.

«ورتالىق باسشىلىعىنىڭ جاۋاپسىزدىعىنان وسىنداي وقيعالار بولىپ جاتىر. ولار 4 جىل بويى ەشتەڭە ىستەمەگەن. مەملەكەتتىك ورگانداردى جالعان انىقتامالارمەن الداپ كەلدى. بىلتىر قاراشا ايىندا العاش رەت اپات بولعان كەزدە ءبىز باسقا كاسىپورىندار مەن جىلۋ ەلەكتر ورتالىقتارىنان 160 ماماندى تارتىپ، قالپىنا كەلتىرۋ جۇمىسىن قولعا الدىق. وتە مۇشكىل حالدە بولعان جوعارى قىسىمدى 2 قازاندىقتى قىسقا ۋاقىت ۇشىندە جوندەپ شىعاردىق»، - دەيدى وبلىس اكىمى.

ونىڭ ايتۋىنشا، جەو يەلەرى بۇل قازاندىقتاردى جوندەۋدى مۇلدە ويلاماعان. ءتىپتى ولار كومىر اقىسىن تولەۋدەن دە باس تارتقان. سوعان قاراماستان قاراجىرا كەن ورنى اكىمدىك كەپىلدىگىمەن كومىر جەتكىزۋدى توقتاتپادى. قازىر ورتالىقتىڭ كومىر ءۇشىن قارىزى 1 ميلليارد 350 ميلليون تەڭگەنى قۇراعان.

«جىلۋ تەمپەراتۋراسى تومەندەپ كەتكەنى ءۇشىن ريددەر حالقىنان كەشىرىم سۇرايمىن. بۇل تۇرعىندار ءۇشىن تىكەلەي ماڭىزدى وسىنداي نىسان يەلەرىنىڭ ولقىلىقتارىنا جول بەرىپ وتىرعان زاڭداعى كەمشىلىكتەردەن تۋىندادى دەۋگە دە بولادى. پرەزيدەنتتىڭ تاپسىرماسىمەن قۇزىرلى مينيسترلىك تاراپىنان زاڭعا وزگەرىستەر ەنگىزىلىپ، بىزگە ج ە و جۇمىستارىن تالاپقا سايكەس باقىلاۋعا مۇمكىندىك بولادى دەپ سەنەمىن»، - دەدى دانيال احمەتوۆ.

ەسكە سالساق، كەشە ريددەردەگى جىلۋ ەلەكتر ورتالىعىنان ءورت شىققان بولاتىن.

قىزىل جالىن بىرنەشە ساعاتتا اۋىزدىقتالدى.

وتقا ورانعان كومىر سەحى ءۇش كۇندە قالپىنا كەلتىرىلەتىندىگى حابارلاندى.

قازىر جىلۋ ەلەكتر ورتالىعىنىڭ باسشىلىعىنا قاتىستى تەرگەۋ جۇرگىزىلىپ جاتىر.

اۆتور

تالعاتجان مۇحامەتبەك ۇلى