تۇركىستان وبلىسىندا مەكتەپ ديرەكتورلارىن تاعايىنداۋ كونكۋرسى تىكەلەي ەفيردە ءوتتى

None
تۇركىستان. قازاقپارات - تۇركىستان وبلىسىندا مەكتەپ ديرەكتورلارىن تاعايىنداۋ كونكۋرسى تىكەلەي ەفيردە ءوتتى، دەپ حابارلايدى قازاقپارات ءتىلشىسى.

بۇگىن تۇركىستان وبلىسىندا ءبىلىم بەرۋ ۇيىمدارىنىڭ ءبىرىنشى باسشىلارىن تاعايىنداۋ كونكۋرسىنىڭ «اڭگىمەلەسۋ» كەزەڭى ءوتتى. باستى ەرەكشەلىك - كونكۋرستىڭ شەشۋشى كەزەڭى فەيسبۋك الەۋمەتتىك جەلىسىندە تىكەلەي ەفيردە جۇرگىزىلدى. تۇركىستان وبلىسى اكىمىنىڭ ورىنباسارى بەيسەنباي تاجىبايەۆ ءبىلىم ۇيالارىنىڭ باسشىلارىنا، جالپى ۇستازدارعا ماڭىزدى جاۋاپكەرشىلىك جۇكتەلگەنىن، باسشىلاردى تاعايىنداۋ ءادىل جۇرگىزىلۋى ءتيىس ەكەنىن ايتتى.

«ءبىلىم ۇيىمدارىنىڭ باسشىلارىن ىرىكتەۋ ءادىل ءارى اشىق جۇرگىزىلۋى ءتيىس. بۇگىنگى كونكۋرس بارىسى الەۋمەتتىك جەلىدە تىكەلەي كورسەتىلىپ جاتىر. كوميسسيا قۇرامىنا دا بىلىكتى ازاماتتار تارتىلدى. كوميسسيا ءاربىر ۇمىتكەرگە تەرەڭ تالداۋ جۇرگىزىپ، بىلىكتىلىگىنە، پاراساتتىلىعىنا، ادامي بولمىسىنا ءادىل باعاسىن بەرۋى ءتيىس»، - دەدى بەيسەنباي تاجىبايەۆ.

«اڭگىمەلەسۋ» كەزەڭىنە 53 ۇمىتكەر قاتىسۋدا. ولار 35 مەكەمەگە باسشى بولۋدان ءۇمىتتى. ۇمىتكەردى باعالاۋ اشىق داۋىس بەرۋ ارقىلى وتۋدە. سونىمەن قاتار باعالاۋ پاراعى قوسا تىركەلەدى.

ايتا كەتەرلىگى، تالاپقا سايكەس ۇمىتكەرلەر «اڭگىمەلەسۋ» كەزەڭىنە دەيىن كونكۋرستىڭ قۇجات تىركەۋ، تەست، قامقورشىلىق كەڭەستەن كەلىسىم الۋ كەزەڭدەرىنەن وتكەن. ولاردىڭ اراسىندا ەڭبەك ءوتىلى 30 جىلدان اسقان اسا تاجىريبەلى ۇستازدار دا بار.

اۆتور

قايرات زاينيشيەۆ

سوڭعى جاڭالىقتار