شوقىنۋ مەرەكەسىندە سۋعا ءتۇسۋ ءراسىمى نە بىلدىرەدى؟

استانا. قازاقپارات - قىستىڭ ايازدى كۇندەرى مۇزداي سۋعا شومىلاتىن شوقىنۋ مەرەكەسى جايلى نە ءبىلۋ كەرەك؟ بۇل ءراسىم نەنى بىلدىرەدى؟ ايازدا سۋعا ءتۇسۋدىڭ پايداسى قانداي جانە كىمدەرگە مۇنداي سۋعا تۇسۋگە بولمايدى؟

شوقىنۋ مەرەكەسى ءداستۇرلى تۇردە 19- قاڭتاردان باستاپ تويلانادى. شوقىنۋ مەرەكەسىندە سۋقويمالارداعى سۋ ەمدىك قاسەيتكە يە بولادى دەپ سانالادى، سوندىقتان ونى قاسيەتتى ساناپ، وعان سۋعا تۇسەدى.

شوقىنۋ مەرەكەسىنىڭ تاعى ءبىر اتاۋى بار: يوردان. بۇل كۇنى يوردان وزەنىندە يسا ءماسىح شوقىنعان دەلىنەدى. بۇل ءراسىم كەزىندە يوردان وزەنىنىڭ سۋى يسا كىرەسىمەن قاسيەتتى بولىپ، ءوزىن ەمدىك سۋ ارقىلى تازارتۋ ءۇشىن ويىققا نەمەسە كەز كەلگەن سۋقويماسىنا كىرىپ، سۋعا ءتۇسۋ ءداستۇرى پايدا بولعان. بۇل ءداستۇر بويىنشا، شوقىنۋ مەرەكەسىندە سۋعا ءتۇسۋ كۇنالاردى «جۋادى» جانە اعزانى شىنىقتىرادى. ادەتتە، ارنايى جەرلەردە سۋعا تۇسەدى: الدىن الا ويىلعان جەرلەردە (ءجيى مۇزدى كىرەس تۇرىندە ويادى) جانە قاۋىپسىز سۋ قويمالاردا.

ايازدا سۋعا ءتۇسۋدىڭ پايداسى قانداي؟

شىنىعۋ. ءبىزدىڭ ەلدە كوپشىلىك ساۋىعۋ ماقساتىندا شومىلادى. مۇزداي سۋعا شومىلۋ يممۋنيتەتتى نىعايتادى. الايدا سالقىن سۋعا تۇسۋگە بىرتىندەپ اعزانى دايىنداۋ كەرەك.

قان تامىرلاردىڭ قاتايۋى. كەنەتتەن كەلگەن سۋىق قاننىڭ تەرىگە جىلدام قۇيىلۋىنا ىقپال ەتەدى. سايكەسىنشە، سۋعا باتۋ كەزىندە كاپيلليارلار، كۇرەتامىرلار جانە كوكتامىرلار ەسەلەپ جۇمىس ىستەيدى. ول قان اينالىمىن جاقسارتادى.

كوڭىل كۇيدىڭ جاقسارۋى. كوپشىلىك مۇزداي سۋعا تۇسكەننەن كەيىن كوڭىل كۇيلەرىنىڭ بىردەن كوتەرىلگەنىن بايقايدى. سەبەبى اعزا بۇل كەزدە ەندورفيندەر بولەدى.

كالوريا جاعۋ. سالقىن سۋعا كىرۋ كەزىندە اعزا بارلىق كۇشىن جىلۋدى ساقتاۋعا جىبەرەدى. وعان بۇل ءۇشىن كوپ كۇش قاجەت. ول ونى ادەتتە ماي قاباتىنان الادى.

ايازدا سۋعا تۇسۋگە قانداي قارسى كورسەتىلىم بار؟

ش ج ق «وتباسىلىق مەديتسينا ورتالىعىنىڭ» جالپى تاجىريبەلىك دارىگەرى سەيتماعۇلوۆا اقبوتا ايازدا كىمدەرگە سۋعا تۇسۋگە بولمايتىنىن ايتتى:

«مۇزداي سۋعا تەك ساۋ ادامدار عانا تۇسە الادى. جۇرەك-قان تامىرلار اۋرۋلارى، جۇيكە جۇيەسى بۇزىلىسى، جۇقپالى اۋرۋلار، گينەكولوگيالىق قابىنۋلار، سوزىلمالى اۋرۋلار، قانت ديابەتى، سەمىزدىك، نەسەپ-جىنىستىق جۇيەسى اۋرۋلارى بار ادامدارعا سۋىق سۋعا ءتۇسۋگە تىيىم سالىنادى. سونداي-اق ءبىز جۇكتى ايەلدەرگە، بالالارعا جانە قارتتارعا مۇنداي سۋعا ءتۇسۋدى ۇسىنبايمىز. سۋعا تۇسەردە ىشىمدىك ىشپەڭىز»، - دەپ ەسكەرتتى اقبوتا سەيتماعۇلوۆا.

وزىڭىزگە زاقىم كەلمەس ءۇشىن سۋعا قالاي دۇرىس ءتۇسۋ كەرەك؟

سۋعا تۇسۋگە ءبىر ساعات قالعاندا تاماق جەپ الىڭىز. سول كەزدە اعزادا ەنەرگيا قورى بولادى. سۋعا كىرمەس بۇرىن كىشكەنە جاتتىعۋ جاساپ الىڭىز. مىسالى، بىرنەشە رەت وتىرىپ-تۇرىڭىز. بۇل قان اينالىمدى كۇشەيتىپ، دەنەنى قىزدىرادى. «كوز قورقاق، قول باتىر» دەمەكشى سۋعا كىرەردە ۇزاق ويلانىپ تۇرماڭىز. ەگەر ءبىرىنشى رەت مۇزداي سۋعا ءتۇسىپ جاتساڭىز، سۋدا 15-20 سەكۋندتان ارتىق تۇرماڭىز. سۋدان شىققان سوڭ دەنەنى قۇرعاتىپ ءسۇرتىپ، كيىنىپ الىپ، جىلى شاي ءىشىڭىز. ايازدا قاۋىپسىز جەرلەردە عانا سۋعا تۇسۋگە بولادى.

massaget.kz