كەشە عانا بەكىتىلگەن ۇلىتاۋ وبلىسىنىڭ ءتولتاڭباسى قايتا تاڭدالاتىن بولدى
«وبلىس ءتولتاڭباسى ماسەلەسى الەۋمەتتىك جەلىلەردە قىزۋ پىكىرتالاس تۋدىردى. وسىعان بايلانىستى كونكۋرس قورىتىندىلارىن جانە سايكەسىنشە كونكۋرستىق كوميسسيانىڭ ناتيجەلەرىن جويۋ تۋرالى شەشىم قابىلداندى»، - دەلىنگەن ۇلىتاۋ وبلىسى اكىمدىگىنىڭ Facebook-پاراقشاسىندا.
ەسكە سالايىق، 18- قاڭتار كۇنى ءوڭىر اكىمدىگى ءتولتاڭبانى تاڭداۋ كونكۋرسىنىڭ ناتيجەسىن جاريالاعان بولاتىن. كونكۋرسقا رەسپۋبليكانىڭ تۇپكىر-تۇكپىرىنەن 130 عا جۋىق ۇسىنىس تۇسكەن. بارلىق ەسكيزدەر 2022-جىلعى 12-18- جەلتوقسان ارالىعىندا ارنايى ۇيىمداستىرىلعان كورمە اياسىندا جەزقازعان تۇرعىندارى مەن قوناقتارىنىڭ نازارىنا ۇسىنىلعان.
ۇلىتاۋ وبلىسىنىڭ ءتولتاڭباسىن تۇرعىندار Instagram-دا تانىمال پاراقشالاردىڭ بىرىندە داۋىس بەرۋ ارقىلى تاڭداعان. ناتيجەسىندە ۇلىتاۋلىق ديزاينەر، ەۋرازيا ديزاينەرلەرى وداعىنىڭ مۇشەسى شاحيبادەن سەيىتكەنوۆتىڭ جۇمىسى جەڭىسكە جەتكەن.
ءتولتاڭبانى تاڭداۋ بويىنشا ارنايى كوميسسيا دا قۇرىلعان. ونىڭ قۇرامىنا وڭىرگە تانىمال عالىمدار، سۋرەتشىلەر، تاريحشىلار جانە قۇرمەتتى ارداگەرلەر ەنگەن.
