فۋتبولشى، قوبىزشى تاتيانا گەراسيموۆا: قازاقتىڭ ءتىلى دە دالاسىنداي باي

None
الماتى. قازاقپارات - الەۋمەتتىك جەلىلەر دامىعالى قازاق تىلىندە سويلەيتىن وزگە ۇلت وكىلدەرى اراسىندا بلوگەرلەر سانى ارتىپ، وزىندىك اۋديتورياسى قالىپتاسىپ كەلەدى. سولاردىڭ ءبىرى - تاتيانا گەراسيموۆا.

ول قازاقتىڭ مادەنيەتى مەن ءداستۇرىن دە بالا كۇنىنەن بويىنا ءسىڭىرىپ وسكەن، قوبىز اسپابىن جەتىك مەڭگەرگەن. Instagram جەلىسىندە 21 مىڭنان استام وقىرمانى بار 21 جاستاعى تاتيانا قازاقپارات تىلشىسىنە الداعى جوسپارلارى تۋرالى ايتىپ بەردى.

- تاتيانا، قازاق تىلىندە جاقسى سويلەيسىز. ءتىلدى قالاي ۇيرەندىڭىز؟

- ورىس ۇلتىنان بولسام دا قازاق ءتىلىن كىشكەنتاي كەزىمنەن بىلەمىن. 2002-جىلى اقتاۋ قالاسىندا دۇنيەگە كەلدىم. اعام ەكەۋمىز اقتاۋداعى بالالار ۇيىندە تاربيەلەندىك. قازاق مەكتەبىندە ءبىلىم الدىم. قازاق ءتىلى - ءوزىنىڭ دالاسىنداي باي، وتە ادەمى ءتىل دەپ ەسەپتەيمىن. دوستارىمنىڭ باسىم بولىگى قازاقتار. ءبىراق، انام قازاق تىلىندە سويلەمەيدى.

- انام دەپ قالدىڭىز، ءسىزدى باسقا وتباسى اسىراپ الدى ما؟

- جوق. مەن 3 جاسىمنان 18 جاسقا دەيىن بالالار ۇيىندە ءوستىم. تۋعان انامىزبەن بايلانىس ۇزىلگەن ەمەس. انام اعامدى، مەنى جانە ەكى ءىنىسىن بالالار ۇيىنە وتكىزگەن بولاتىن. ءبىراق، ءبىزدى ءبىرجولا تاستاپ كەتكەن جوق. ءجيى كەلىپ تۇراتىن. قازىر ءبارىمىز بىرگە تۇرامىز. ءبىز انامىزدى كىنالامايمىز. بۇل - تاعدىر. ءتىپتى، ول كىسىگە ەشقاشان رەنجىگەن ەمەسپىز.

- نەگىزگى ماماندىعىڭىز قانداي؟

- مەكتەپتى بىتىرگەن سوڭ، اقتاۋ قالاسىنىڭ 2- شاعىناۋدانىندا ورنالاسقان گۋمانيتارلىق كوللەدجدە ءبىلىم الدىم. ماماندىعىم - جاتتىقتىرۋشى. 13 جىل فۋتبولمەن شۇعىلداندىم. قازاقستان قىزدار قۇراماسىندا بولدىم. شىمكەنت قالاسىنىڭ «ب ي ي ك- قازىعۇرت» قىزدار فۋتبول كومانداسىندا كەلىسىمشارت بويىنشا 3 جىل وينادىم. قازىر ەشقانداي كوماندادا جوقپىن. فۋتبولدى ازىرشە قويا تۇرامىن. جان- جاقتى بولعىم كەلەدى، ءوزىمدى مىقتى سەزىنگىم كەلەدى.

- مەنىڭشە ءسىز جان - جاقتى، ءارى بەلسەندىسىز. قازاقتىڭ قوبىزىن قۇيقىلجىتا تارتادى ەكەنسىز . ونى قايدان ۇيرەندىڭىز؟

- ءيا، ونەردەن دە قۇر قول ەمەسپىز. قوبىز كۋرسىنا التى جىل باردىم. قازاق مۋزىكاسىندا قوبىزدىڭ الاتىن ورنى ەرەكشە. قوبىز ادامنىڭ داۋىسىن، قاسقىردىڭ ۇلۋىن، اققۋدىڭ قيقۋىن، جەل مەن سۋدىڭ ءۇنىن بەرە الادى. بۇل اسپاپ ماعان قاتتى ۇنايدى. قولىم بوس كەزدە وينايمىن. الايدا، كاسىبي تۇردە اينالىسىپ كورگەن جوقپىن. ءبىر كەزدەرى ءان دە سالعام. قازاقتىڭ ءتىلىن عانا ەمەس، مادەنيەتى مەن ءداستۇرىن بالا كۇنىمنەن بويىما ءسىڭىرىپ ءوستىم. ەندى بلوگەرلىككە بەت بۇردىم. قازىر 21 مىڭنان اسا وقىرمانىم بار.

- وقىرمانىڭىزبەن بايلانىسىڭىز قالاي؟

- مەن ءوز پاراقشاما كۇندەلىكتى ءومىرىمدى ەش بۇكپەسىز شىنايى سالىپ وتىرامىن. بۇل ۆيدەولاردى قىزىعۋشىلىعىم بولعاندىقتان جەلىگە سالامىن. قازاق تىلىندە سويلەيمىن. قۇدايعا شۇكىر، قازاق تىلىندە ەركىن سويلەپ، ساۋاتتى جازامىن. وقىرماندارىمنىڭ باسىم بولىگى - ۇلكەن كىسىلەر. كوشەگە شىققاندا تانىپ جاتادى. مەنىمەن سۋرەتكە تۇسەتىندەر بار. «وقىرمانىڭىزبىن» دەسە كادىمگىدەي قۋانىپ قالامىن.

- ءسوز اراسىندا، قۇدايعا شۇكىر دەپ قالدىڭىز. شۇكىرشىلىك - مۇسىلماننىڭ سيپاتى. ءسىز مۇسىلمانسىز با؟

- ءيا، يسلام ءدىنىن قابىلدادىم. ءبىراق، ناماز وقىپ، مەشىتكە بارمايمىن. بالالار ۇيىندە جۇرگەندە «ءبيسميللا» دەپ ايتىپ قالعانىم بار. سول كەزدە دوستارىم «سەن ەندى مۇسىلمانسىڭ» دەدى. سول كەزدە قابىلدادىم دەپ ويلايمىن.

- ارمان، ماقساتتارىڭىز جايلى ايتىپ بەرسەڭىز؟

- مەن ارمانىم تۋرالى پوستتارىمدا كوپ جازامىن. العا قويعان ماقساتىم ايتارلىقتاي. ەڭ الدىمەن، وقىرماندار سانىن تاعى كوبەيتكىم كەلەدى. سول ءۇشىن اقتاۋدان الماتىعا كوشىپ كەلدىم. الماتى - جاستارعا مۇمكىندىك بەرەتىن الىپ شاھار. يدەيالارىمدى وسى قالادا جۇزەگە اسىرعىم كەلەدى. اقتاۋ قالاسىدا دۇكەن اشۋ جوسپارىمدا بار.

- سۇحباتىڭىزعا راحمەت!

اۆتور

الما مۇقانوۆا

سوڭعى جاڭالىقتار