پەش جاققاندا كومىرتەگى توتىعىنا ۋلانباس ءۇشىن قانداي قاۋىپسىزدىك ەرەجەلەرىن ساقتاۋ كەرەك

None
وسكەمەن. قازاقپارات - شىعىس قازاقستان وبلىسىنىڭ قۇتقارۋشىلارى پەش جاققاندا كومىرتەگى توتىعىنا ۋلانباس ءۇشىن قانداي قاۋىپسىزدىك ەرەجەلەرىن ساقتاۋ كەرەكتىگىن ءتۇسىندىردى، دەپ حابارلايدى قازاقپارات ءتىلشىسى.

وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، وتكەن جىلى پەشتەن بولىنەتىن قاۋىپتى گازدان 14 ادام، ونىڭ ىشىندە 7 بالا زارداپ شەكتى. بارلىق وقيعا تۇرعىندار ۇيىقتاپ جاتقاندا بولعان.

«7 جاعداي - پەشتە جارىق بولۋىنان، 5 - ءتۇتىن مۇرجاسىنىڭ تازارتىلماعانىنان، 2 - پەشتىڭ ءتۇتىن تارتۋى بولماۋى سەبەبىنەن تىركەلدى. بيىلعى جىلىتۋ ماۋسىمىندا كومىرتەگى توتىعىنان 10 ادام ۋلانعان. سوڭعى وقيعا وتكەن دەمالىس كۇنى وسكەمەن قالاسىندا بولعان. جارىعى بار پەش پايدالانىلعان ۇيدە 1950 -جىلى تۋعان ايەل جانە 1955 -جىلعى ەر ادام ۋلانىپ، اۋرۋحاناعا جاتقىزىلدى»، - دەلىنگەن اقپاراتتا.

ۋلى گاز بىردەن تىنىس الۋ جۇيەسى ارقىلى دەنەگە ەنىپ، وكپەدەن قان اينالىمى جۇيەسىنە وتەدى. وندا گەموگلوبينمەن ارالاسقاننان كەيىن قان وتتەگىن تاسىمالداۋ جانە ونى تىندەرگە جەتكىزۋ قابىلەتىن جوعالتادى. سونىڭ سالدارىنان ەڭ اۋەلى مي زارداپ شەگەدى.

وسى رەتتە، قۇتقارۋشىلار حالىققا پەش جاققاندا كومىرتەگى توتىعىمەن ۋلانباس ءۇشىن قانداي قاۋىپسىزدىك ەرەجەلەرىن ساقتاۋ كەرەكتىگىن ءتۇسىندىرىپ ءوتتى.

- پەشتى 3 ايدا كەمىندە 1 رەت تازالاۋ كەرەك.

- جانىپ جاتقان پەشتى قاراۋسىز قالدىرۋعا، ونى قاداعالاۋدى بالالارعا تاپسىرۋعا بولمايدى.

- پەش جاققان كەزدە تەز تۇتاناتىن سۇيىقتىقتاردى قولدانباڭىز.

- پەش پەن ءتۇتىن مۇرجاسىنىڭ بەتىنەن 0,5 مەتردەن كەم قاشىقتىقتا جانعىش زاتتار مەن ماتەريالداردى كەپتىرمەڭىز.

- جەلدەتۋ جانە گاز ارنالارىن ءتۇتىن مۇرجاسى رەتىندە پايدالانۋعا بولمايدى.

- اقاۋلارى مەن جارىقتارى بار پەشتى پايدالانباڭىز.

سوڭعى جاڭالىقتار