ۇلىتاۋ وبلىسىنىڭ ەلتاڭباسى بەكىتىلدى

جەزقازعان. قازاقپارات - بىلتىر جاڭادان قۇرىلعان ۇلىتاۋ وبلىسىنىڭ ەلتاڭباسى بەكىتىلدى.

بۇل تۋرالى ءوڭىر اكىمدىگىنىڭ الەۋمەتتىك جەلىدەگى رەسمي پاراقشاسىندا ءمالىم بولدى، دەپ حابارلايدى قازاقپارات ءتىلشىسى.

«ءوڭىردىڭ باستى رامىزىنە قاتىستى رەسپۋبليكامىزدىڭ تۇپكىر-تۇكپىرىنەن 130 عا جۋىق ۇسىنىس ءتۇستى. بارلىق ەسكيزدەر 2022-جىلعى 12-18- جەلتوقسان ارالىعىندا ارنايى ۇيىمداستىرىلعان كورمە اياسىندا جەزقازعان تۇرعىندارى مەن قوناقتارىنىڭ نازارىنا ۇسىنىلدى. ۇلىتاۋ وبلىسىنىڭ ەلتاڭباسىن تاڭداۋعا ءوڭىردىڭ بارلىق تۇرعىندارى Instagram پاراقشاسىندا تانىمال «ەتو جەز» پاراقشاسىندا داۋىس بەرۋ ارقىلى قاتىسۋعا مۇمكىندىك الدى. ونلاين داۋىس بەرۋ ناتيجەلەرى بويىنشا ەڭ كوپ داۋىس جيناعان 15№نۇسقا بولىپ ايقىندالدى»، - دەلىنگەن ۇلىتاۋ وبلىستىق اكىمدىگىنىڭ Instagram پاراقشاسىندا جاريالانعان حابارلامادا.

بەكىتىلگەن وبلىس ەلتاڭباسىنىڭ اۆتورى - ۇلىتاۋلىق ديزاينەر، ەۋرازيالىق ديزاينەرلەر وداعىنىڭ مۇشەسى شاحيبادەن سەيىتكەنوۆ.

«ۇلىتاۋ وبلىسىنىڭ ەلتاڭباسى قوڭىر جانە كوك تۇستەردى پايدالانا وتىرىپ جاسالعان. ەلتاڭبانىڭ ورتاسىندا ۇلىتاۋ تاۋلارىن ەسكە تۇسىرەتىن سۋرەت ورنالاستىرىلعان. تاۋلاردىڭ بەينەسى بوستاندىقتىڭ، بولاشاققا اپاراتىن جول، رۋحاني ورلەۋدىڭ سيمۆولى رەتىندە بەينەلەنگەن. تومەنگى جاعىندا ورنالاسقان «ŪLYTAU» جازۋى تاڭبالى تاس پەتروگليفتەرى ستيلىندە جاسالعان. بۇل ءوز كەزەگىندە ولكەنىڭ باي تاريحىن، حالىقتىڭ بىرلىگى مەن تۇتاستىعىنىڭ عاسىرلار بويعى داستۇرلەرىن بەينەلەيدى»، - دەپ ءمالىم ەتتى وبلىستىق اكىمدىكتىڭ باسپا ءسوز قىزمەتىنەن.

ەلتاڭبانىڭ ەتالونىن قۇرامىنا ايماقتاعى تانىمال عالىمدار مەن سۋرەتشىلەر، تاريحشىلار جانە قۇرمەتتى ارداگەرلەر ەنگەن ارنايى كوميسسيا بەكىتكەن.