بيىل ەلىمىزدە قانداي رەسپۋبليكالىق جولدار جوندەلەدى
بۇل تۋرالى ۆەدومستۆونىڭ كەڭەيتىلگەن القا وتىرىسىندا ق ر يندۋستريا جانە ينفراقۇرىلىمدىق دامۋ ۆيتسە-ءمينيسترى الماز ىدىرىسوۆ ايتتى.
ونىڭ ايتۋىنشا، بيىل رەسپۋبليكالىق جولداردىڭ جەلىسى بويىنشا 7,3 مىڭ شاقىرىمعا، سونداي-اق جەرگىلىكتى جەلىدە 3,2 مىڭ شاقىرىم جولدى سالىپ، جاڭعىرتۋ جوسپارلانىپ وتىر.
ايتا كەتۋ كەرەك، قازىر ەلىمىزدىڭ شىعىس وڭىرىندە «تالدىقورعان-وسكەمەن»، «قالباتاۋ-مايقاپشاعاي»، «ءۇشارال-دوستىق» سىندى ءىرى اۆتوجول جوبالارى جۇزەگە اسىرىلىپ كەلەدى. بيىل 180 شاقىرىمعا جەتەتىن «ءۇشارال-دوستىق» ۋچاسكەسىندە ءتيىستى جۇمىستاردى تولىق اياقتاۋ كوزدەلگەن. قالعان ۋچاسكەلەر بويىنشا جاڭا جابىن ارقىلى جول قوزعالىسىن اشۋ 2024-جىلعا مەجەلەنىپ وتىر.
ۆيتسە-مينيستر «قىزىلوردا-جەزقازعان» ۋچاسكەسىندەگى قۇرىلىس تۋرالى ايتا كەلە، بيىل ۇلىتاۋ وبلىسىنداعى جول ۋچاسكەسىندە ءتيىستى جۇمىستار باستالاتىنىن اتاپ ءوتتى. سونداي-اق «جەزقازعان-قاراعاندى» جوباسى بويىنشا دا قۇرىلىس جۇمىستارى باستالاتىنى بەلگىلى بولدى.
مەملەكەت باسشىسىنىڭ تاپسىرماسىنا سايكەس بىلتىرعى جەلتوقسان ايىندا مينيسترلىك قازاقستان رەسپۋبليكاسىنىڭ كولىك-لوگيستيكالىق الەۋەتىن دامىتۋدىڭ 2030-جىلعا دەيىنگى تۇجىرىمداماسىن بەكىتكەنىن ايتا كەتكەن ءجون. بۇل سالانى ودان ءارى دامىتىپ، الداعى ءىس-قيمىلدى ايقىندايتىن نەگىزگى قۇجات سانالادى. ەلىمىزدىڭ ترانزيتتىك الەۋەتىن ارتتىرۋ ءۇشىن بىلتىر تەمىرجول سالاسىنداعى ءىرى ينفراقۇرىلىمدىق جوبالار جۇزەگە اسىرىلا باستاعانىن ايتا كەتەيىك. اتاپ ايتقاندا، 2022-جىلدىڭ قاراشا ايىندا تەمىرجول كولىگى سالاسىنداعى ءىرى جوبالاردىڭ ءبىرى - «دوستىق- مويىنتى» تەمىرجول ۋچاسكەسىنىڭ ەكىنشى تورابىنىڭ قۇرىلىسى باستالعان بولاتىن.
