ەركەجان كۇنتۋعان «جىبەك جولى» تەلەارناسىنىڭ ديرەكتورى بولىپ تاعايىندالدى

ەركەجان كۇنتۋعان پاۆلودار مەملەكەتتىك پەداگوگيكالىق ينستيتۋتىنىڭ فيلولوگيا فاكۋلتەتىن بىتىرگەن. پاۆلودارداعى «ءبىلىم» گازەتىنىڭ رەداكتورى، «ەۋرازيا» ءبىرىنشى ارناسى اقپاراتتىق-ساراپتامالىق باعدارلامالار ديرەكسياسىنىڭ پروديۋسەرى، «Atameken Business Channel» تەلەارناسىنىڭ اعا پروديۋسەرى، باس پروديۋسەرىنىڭ ورىنباسارى بولىپ جۇمىس ىستەدى.

2020-2021-جىلدارى «ەۋرازيا» ءبىرىنشى ارناسىنىڭ باعدارلامالىق بولىمىندە شەف-رەداكتور، كەيىن وسى تەلەارنانىڭ كرەاتيۆتى پروديۋسەرى بولدى.

Jibek Joly تەلەارناسىنىڭ ديرەكتورى لاۋازىمىنا تاعايىندالعانعا دەيىن «ق ر پرەزيدەنتى تەلەراديوكەشەنى» ك ە ا ق كرەاتيۆتى ديرەكتورى قىزمەتىن اتقاردى.

ايتا كەتەيىك، كورەرمەنگە QazaqTV دەگەن اتپەن تانىمال بولعان تەلەارنا 2022-جىلعى 1- قىركۇيەكتەن باستاپ Jibek Joly اتاۋىمەن حابار تاراتا باستادى. ارنانىڭ مازمۇنى قوعامدىق-ساياسي وقيعالار مەن قوعامدى تولعاندىراتىن ماسەلەلەردى، مادەني جانە سپورتتىق جاڭالىقتاردى تۇگەل قامتيدى.

HotBird 13B، Gaaxy 19, Yamal 401 90° (FSU)، Türksat 3A، KazSat 3 (قازاقستان) جانە MEASAT 3A سپۋتنيكتەرى ارقىلى جاڭا «Silk Way» برەندىن يەلەنگەن تەلەارنا بۇگىندە 118 ەلدىڭ كورەرمەندەرىنە 5 تىلدە - قازاق، ورىس، اعىلشىن، وزبەك، قىرعىز تىلدەرىندە كونتەنت ۇسىنادى. «Jibek Joly» ۇلتتىق تەلەارناسىنىڭ جانە ونىڭ «Silk Way» سپۋتنيكتىك نۇسقاسىنىڭ بۇكىل الەمدەگى اۋديتورياسى قازىر 300 ميلليوننان اسادى. 2022-جىلدىڭ اياعىنا قاراي ۇلتتىق سپۋتنيكتىك تەلەارنا قىرعىز رەسپۋبليكاسىندا حابار تاراتا باستادى.