16:58, 18 - قاڭتار 2023 | GMT +6
قىرعىزستاندا مەملەكەتتىك قىزمەتشىلەردىڭ سىياقىسىنا دروندار ساتىپ الىندى
بىشكەك. قازاقپارات - قىرعىزستاندا 2022-جىلدىڭ سوڭىندا مەملەكەتتىك قىزمەتشىلەرگە بەرىلەتىن توقساندىق سىياقى ۋاقىتشا توقتاتىلدى.
ول قارجىنى زاماناۋي اسكەري تەحنيكا ساتىپ الۋعا جۇمساعان.
بۇل تۋرالى قىرعىزستان پرەزيدەنت اكىمشىلىگىنىڭ اقپاراتتىق ساياسات قىزمەتىنىڭ جەتەكشىسى دايىربەك ورۋنبەكوۆ جەلىدەگى پاراقشاسىندا جازدى، دەپ حابارلايدى قازاقپاراتتىڭ مەنشىكتى ءتىلشىسى.
«باتكەن وبلىسىنداعى قارۋلى قاقتىعىستان كەيىن رەسپۋبليكانىڭ قارۋلى كۇشتەرى مەن قاۋىپسىزدىگىن نىعايتۋعا ەرەكشە كوڭىل ءبولىنىپ جاتىر. مەملەكەتتىك قىزمەتشىلەردىڭ سىياقىسى ەلدىڭ قاۋىپسىزدىگىنە قوسقان ۇلەس رەتىندە الىندى. «بايراكتار»، «اكسۋنگۋر»، «اكىنجى» جانە «انكا» سىندى زاماناۋي اسكەري تەحنيكا ساتىپ الىنىپ، قىرعىزستانعا جەتكىزىلدى. مەملەكەتتىك قىزمەتشىلەر سىياقى الماي ەلدىڭ قاۋىپسىزدىگىن نىعايتۋعا كىشىگىرىم ۇلەس قوستى دەپ ايتۋعا بولادى»، - دەدى د. ورۋنبەكوۆ.
