دەپۋتات مەكتەپتەردەگى سوڭعى قوڭىراۋ داتاسىن باسقا كۇنگە اۋىستىرۋدى سۇرادى

None
استانا. قازاقپارات - بۇگىن ءماجىلىستىڭ جالپى وتىرىسىندا امانجول التاي مەكتەپتەردەگى سوڭعى قوڭىراۋ كۇنىن 30- مامىرعا نەمەسە 1- ماۋسىمعا اۋىستىرۋدى سۇرادى، دەپ حابارلايدى قازاقپارات ءتىلشىسى.

«ەلىمىزدە 31- مامىر اشارشىلىق جانە ساياسي قۋعىن-سۇرگىن قۇرباندارىن ەسكە الۋ كۇنى بولىپ بەلگىلەندى. بۇل كۇنى الاش ارىستارىنىڭ رۋحىنا جاساپ جۇرگەن قۇرمەتىمىز ولاردىڭ ەسكەرتكىشتەرى مەن مەموريالدىق ورىندارعا گۇل شوعىن قويۋدان اسپاي تۇر. ق ر وقۋ-اعارتۋ ءمينيسترىنىڭ 2022-جىلعى 12- تامىزداعى 363№ بۇيرىعىنا سايكەس، ورتا ءبىلىم بەرەتىن مەكتەپتەردەگى سوڭعى قوڭىراۋ 31- مامىر بولىپ بەكىتىلىپ وتىر. الاش ارىستارىنىڭ اماناتىن ۇرپاق ساناسىنا سىڭىرۋگە ءتيىس مينيسترلىكتىڭ 31- مامىر كۇنىنىڭ ماڭىزىنا ءمان بەرمەگەنى قانداي وكىنىشتى؟! ارىستارىمىزدىڭ رۋحىنا ءبىر كۇندى دە تولىق قيماي، اپىل-عۇپىل ازا تۇتقانسىپ، ىلە-شالا توي تويلاپ، دۋمانداتىپ كەتە بەرەتىن بولساق، ەلدىگىمىز قايسى؟! سوندىقتان مەكتەپتەردەگى سوڭعى قوڭىراۋ كۇنىن 30- مامىرعا، نە بولماسا 1- ماۋسىمعا اۋىستىرۋ كەرەك. بۇل - ەشقانداي تالقىلاۋدى قاجەت ەتپەيتىن ادىلەتتى تالاپ»، - دەدى ا. التاي ۇكىمەت باسشىسىنىڭ ورىنباسارى التاي كولگىنوۆتىڭ اتىنا جولداعان ساۋالىندا.

وسى ورايدا ول 31- مامىر ازاتتىق ءۇشىن ارپالىسىپ وتكەن، مەملەكەت قۇرۋ جولىندا مەرت بولعان، ۇلت ءارى ۇرپاق باقىتى ءۇشىن ازاپ شەككەن اسىل بابالار الدىنداعى پارىزىمىزدى پايىمدايتىن، الاش اماناتىنا ادال بولۋعا قۇلشىناتىن كۇن ەكەنىن اتاپ ءوتتى.

«ۇكىمەت وسى كۇننىڭ ءمان-ماڭىزىنا، سالماعىنا لايىق ءىس-شارالاردى ىسكە اسىرۋعا ءتيىس دەپ ەسەپتەيمىن. بىرىنشىدەن، «جالپى حالىقتىق ءۇنسىز ەسكە الۋ مينۋتى» شاراسى ءداستۇرلى ءوتۋى كەرەك. سول ساتتە ەل اۋماعىنداعى بۇكىل كولىك قوزعالىس توقتاپ، ءبىر مينۋتتىق ۇنسىزدىك ارقىلى ساياسي قۋعىن-سۇرگىن جانە اشارشىلىق قۇرباندارىن ەسكە الۋ قاجەت. ەكىنشىدەن، مەكتەپتەردەگى سوڭعى قوڭىراۋ كۇنىن 31-مامىردان باسقا كۇنگە اۋىستىرۋ كەرەك. ۇشىنشىدەن، تەلەارنالاردا ءازىل-قالجىڭ، شوۋ باعدارلامالار، ەسترادالىق كونسەرتتەر توقتاتىلىپ، ونىڭ ورنىنا ەل تاريحىنداعى قاسىرەتتى كۇندەردى جاس ۇرپاقتىڭ جەتىك تۇسىنۋىنە جول اشاتىن مازمۇندى باعدارلامالار كورسەتىلۋگە ءتيىس. اقپارات قۇرالدارىندا اتاۋلى كۇننىڭ تاريحي سالماعىن، تاعىلىمدىق ماعىناسىن جان-جاقتى جەتكىزەتىن ماقالالار جاريالانسىن. ءدال سول كۇنى مەيرامحانالاردا توي وتكىزۋگە تىيىم سالىنسىن. تورتىنشىدەن، 31- مامىر كۇنى ءار اتا-انا وتباسىنداعى ءتالىمدى اڭگىمەسىن، ۇستاز ساباعىن، ءدىن وكىلدەرى ۋاعىزىن، مينيسترلەر مەن اكىمدىكتەر، مەملەكەتتىك مەكەمەلەر جۇمىس كۇنىنىڭ باسىن اشارشىلىق پەن قۋعىن-سۇرگىن قۇرباندارىن ەسكە ەسكە الۋمەن باستاعانى دۇرىس. بەسىنشىدەن، بالاباقشالار مەن مەكتەپتەردە، جوعارعى وقۋ ورىندارىندا بالالار مەن جاستارعا ارناۋلى دارىستەر، پىكىرلەسۋ ساعاتتارى، زيالى قاۋىم جانە تاريحشىلارمەن كەزدەسۋ كەشتەرى وتكىزۋدى جولعا قويۋ قاجەت»، - دەدى دەپۋتات.

سوڭعى جاڭالىقتار