بولاشاق بويىنشا تاعىلىمدامادان وتەتىندەرگە قويىلاتىن تالاپ وزگەردى

None
استانا. قازاقپارات - «بولاشاق» باعادارلاماسىمەن تاعىلىمدامادان وتەتىن قىزمەتكەرلەردىڭ ساناتتارى بەكىتىلدى. بۇل تۋرالى قازاقپارات عىلىم مينيسترلىگىنە سىلتەمە جاساپ حابارلايدى.

2023 -جىلى دەنساۋلىق ساقتاۋ، مادەنيەت، سپورت، تۋريزم، اگروونەركاسىپتىك كەشەن قىزمەتكەرلەرى، مەكتەپ، كوللەدج پەداگوگتەرى، ينجەنەر- تەحنيكتەر، مەملەكەتتىك قىزمەتىشلەر، سونداي- اق بۇقارالىق اقپارات قۇرالدارىنىڭ قىزمەتكەرلەرى ءۇشىن تاعىلىمداما باعدارلاماسىنا 110 «بولاشاق» ستيپەندياسى ءبولىندى.

«حالىقارالىق باعدارلامالار ورتالىعى» اق قۇجات قابىلداۋدى جۇرگىزەدى.

«بيىل تاعىلىمدامادان وتۋشىلەرگە قويىلاتىن تالاپتار كۇشەيتىلدى. ەندى ولار كونكۋرسقا قاتىسۋ ءۇشىن شەت ءتىلى بويىنشا ەمتيحان تاپسىرعانى تۋرالى سەرتيفيكات ۇسىنادى. بۇل «بولاشاق» ستيپەندياسىن تاعايىنداۋ كونكۋرسىن جەتىلدىرۋگە مۇمكىندىك بەرەدى. سونىمەن قاتار ۇمىتكەرلەردىڭ جالپى جۇمىس ءوتىلى ءۇش جىلدان كەم بولماۋى كەرەك. سوڭعى 12 ايدا تاڭداعان ماماندىعى بويىنشا جۇمىس ىستەۋگە ءتيىس. سونداي- اق قابىلداۋشى شەتەلدىك ۇيىمنان شاقىرۋ جانە كەمىندە В1 دەڭگەيىندەگى مەملەكەتتىك تىلدەن ەمتيحان تاپسىرعانى تۋرالى سەرتيفيكات تالاپ ەتىلەدى»، - دەپ حابارلادى عىلىم جانە جوعارى ءبىلىم مينيسترلىگى حالىقارالىق ىنتىماقتاستىق دەپارتامەنتىنىڭ ديرەكتورى ءلاززات ءادىلوۆا.

بيىل «بولاشاق» باعدارلاماسىنىڭ باسىم ماماندىقتار ءتىزىمى تاعىلىمدامادان وتۋگە ارنالعان 162 ماماندىقتى كوزدەيدى. 2023 -جىلى تىزىمگە «بۇلتتى سەرۆيستەر»، «عارىش جۇيەلەرى مەن ينجەنەريا»، «گيدروگەولوگيا»، «پرەتسيزيوندى مەديتسينا»، «تەستولوگيا» جانە ت. ب. سۇرانىسقا يە ماماندىقتار ەنگىزىلدى.

ايتا كەتەيىك، «بولاشاق» باعدارلاماسى اياسىندا شەتەلگە تاعىلىمداماعا جىبەرىلەتىن ستيپەندياتتار كەپىلگە مۇلىك قويمايدى. مىندەتتەمەلەردى ورىنداۋ ءۇشىن ەكى گارانت ۇسىنۋ عانا جەتكىلىكتى. سوڭعى 12 ايدا تۇراقتى تابىسى بار، جاسى 50-گە تولماعان ق ر ازاماتى ۇمىتكەرگە گارانت بولا الادى.

وتىنىمدەر Egov.kz مەملەكەتتىك قىزمەتتەر پورتالى ارقىلى قابىلدانادى. «بولاشاق» ستيپەندياسىن تاعايىنداۋ كونكۋرسىنا قاتىسۋعا قۇجاتتاردى كەلەسى سىلتەمە ارقىلى تاپسىرۋعا بولادى.

ەسكە سالساق، جۋرناليستەر دە «بولاشاق» باعدارلاماسى ارقىلى تاعىلىمدامادان وتە الادى.


سوڭعى جاڭالىقتار