ۆەتنام پرەزيدەنتى نگۋەن سۋان فۋك وتستاۆكاعا كەتتى

ۆەتنامداعى بيلىك جۇيەسىندە كومپارتيانىڭ باس حاتشىسى ۇلكەن بيلىككە يە، دەگەنمەن پرەزيدەنتتىڭ دە ءبىرقاتار وكىلەتتىلىگى بار. ساراپشىلار پىكىرىنشە، نگۋەن سۋان فۋكتىڭ قىزمەتىنەن كەتۋى ۆەتنامنىڭ باسقارۋشى بيلىگىندە كۇشتەردىڭ ورنالاسۋ ءتارتىبىن وزگەرتۋى ىقتيمال.

وتكەن اپتالاردا پرەزيدەنت وتستاۆكاسى تۋرالى كوپ قاۋەسەت تارادى. نگۋەن سۋان فۋك ەل ۇكىمەتىن باسقارعان ۋاقىتتا جۇمىس ىستەگەن پرەمەر- ءمينيستردىڭ ەكى ورىنباسارى ورنىنان كەتكەننەن كەيىن، ن. سۋان فۋك كوپ ۇزاماي ءوز وتستاۆكاسى تۋرالى مالىمدەمە جاسادى. بۇدان بولەك ەكى مينيستر مەن ۇكىمەتتەگى وزگە ءبىرقاتار شەنەۋنىككە قىلمىستىق ايىپ تاعىلدى.

قازىر ۆەتنام كوممۋنيستىك پارتياسىندا جەمقورلىققا قارسى كۇرەس ناۋقانى ءجۇرىپ جاتىر، ونى قاتاڭ ءتارتىپ جاقتاستارى وتكىزۋدە. جۇزدەگەن ۆەتنامدىق كوممۋنيست تەرگەۋگە الىندى.

ەندى پرەزيدەنتتىڭ وتستاۆكاسىن ەلدىڭ ۇلتتىق جيىنى ماقۇلداۋى كەرەك، ولار وسى ماسەلەگە بايلانىستى سارسەنبى كۇنى كەزەكتەن تىس داۋىس بەرۋ وتكىزەدى. دەگەنمەن، ساراپشىلاردىڭ پىكىرىنشە، بۇل تەك رەسمي ءراسىم عانا.

69 جاستاعى نگۋەن سۋان فۋك 2016 - 2021 -جىلدار ارالىعىندا پرەمەر- مينيستر قىزمەتىندە بولدى. 2021 -جىلدىڭ ساۋىرىندە ەل پرەزيدەنتتىگىنە سايلاندى.

فوتو: REUTERS

اۆتور

بالنۇر قوجاگەلدى